Partîya Herêmê Demokratîkî (DBP) ya qezaya Dîyadînî ya Agirî kongreya xo viraşte. Endamê MYKyî yê DBPyî Mehmet Şîrîn Tunç û xeylê îdarekarê HDP û DBPyî zî beşdarê kongre bîyî.
Tunçî kongre de qisey kerd û wina va: “Bi beşdarbîyayîşê heme hêzê dinya Rojhelato Mîyanên û Kurdistan de şer yeno cuyayîş. Ganî kurdî hêzê xo nîşan bidî. Rojawan de serkewtişo ke derbazê tarîxî bibo, ame cuyayîş. Cinîyê kurdî êdî bîyî modelêko sembol.”
Tunçî dewamê qiseykerdişê xo de qala referandumo ke Başûrê Kurdistanî de bî kerd û wina va: “Birêz Ocalan seba başûrîyan vengdayîşê ‘yewîya neteweyî’ kerdbî, labelê ê qebul nêkerdî. Herinda ke yewîya xo awan bikerî, dişmenanê kurdan reyde têkilî ronayî. PDKyî Tirkîya û Îranî reyde îttîfaqê lêminî viraştî û qezencê ê parçeyî eştî tehluke. Eke ewro yewîya ma bibîyêne, na rewşe nêbînê. Netîceyê no sîyaseto lêmin de şarê ma yê Başûrî tehlukeyêko gird reyde têrî mend.”
Qiseykerdişê Tunçî ra dima weçînayîş virazîya û netîceyê weçînayîşî de Abdulbakî Yaşar reyna bî hemserekê qeza.
MA/AGIRÎ