Polîso ke şûbeyê TEMî yê Riha de xebetîyabi, derheqê ekîbo taybet ke wextê OHALî de Riha de wezîfe kerdbî de melumat da û wina va: “No ekîb girêdayeyê Serekkomarî û Wezîrîya Karê Zereyî bî û seba ke HDPyîyan ser o îfade bidî, îşkenceyê bi seyan kesan kerdî. Selahîyetê ti kesî çinêbi ke nînan ra çîyêk vajo, nê kesî mîyanê SADATî de bî.”
Îlanbîyayîşê OHALî ra dima Tirkîya de neheqîyî xeylê zêde bîyî û xeylê bajaran de kesê ke ameyî tepiştene, raştê îşkenceyan ameyî. Nê bajaran ra yewe zî Riha ya; merkez û qezayanê Riha de bi seyan kesî tepişîyayî, îşkence dîyî û tewqîf bîyî.
Seke yeno zanayene 10 û 17ê kanûna 2016î de Stenbol û Kayserî de çalakîyê TAKî bibî û badê ke amebî musayene ke wesayîtê çalakîyan Riha ra şîyî ewja, Wezîrîya Karê Zereyî vera Riha de tehqîqatêko nimite dabî dest pêkerdene û na çarçewa de bi seyan kesî ameybî tewqîf kerdene.
Babete ser o polîso ke o wext Şûbeyê TEMî yê Riha de xebetîyayêne, qisey kerd. Polîsî dîyar kerd ke bi mehneya ke polîsê şûbeyê TEMî nêxebetîyenî, 4 dozgerî û ekîbêkê 40 kesan Riha de ameyî wezîfedar kerdene. Polîsî wina va: “Wezîfedarbîyayîşê nê ekîbî ame nimitene û endamanê ekîbî nameyê qodî bikar ardêne û endamî polîs û leşker nêbî. Bi temamî seba wezîfeyanê winasîyan ameybî resnayene.”
Nê kesî endamê SADATî yî
Polîsî dewamê qiseykerdişê xo de va ‘kesê mîyanê nê ekîbî de ca girewtêne, verê cû bajaranê Kurdîstanî de wezîfe kerdbî û mîyanê fealîyetanê kontrayî de mendbî’ û wina domna: “Nê kesî mîyanê Şîrketê Şêwirmendîye yê Pawitişê Mîyanneteweyî (SADAT) ke îdareyê ci de serşêwirmendê Erdoganî Adnan Tanriverdî esto, mîyan de ca girewtêne. Nê kesan hîna zaf merkezê bajar û qezayan hedef girewtênê.”
Ti kes nêşêno mudaxaleyê înan bikero
Polîsî qiseykerdişê xo de qala têgêrayîşê nê kesan kerd û wina va: “Nê kesî rasterast girêdayeyê Serekkomarî û Wezîrîya Karê Zereyî bî û bi no qeyde wezîfe kerdênê. Mîyanê xo de bi hawayo Fetullah û PKKyî cîya bîbî û vera ti kesî de berpirsîyar nêbî. Nê kesan bi hawayo kêfî muamele kerdene, îşkence û sewbîna çîyan kerdênê. Mudirîya Emnîyetî de selahîyetê ti kesî çinêbi ke nînan ra çîyêk vajo. No ekîb sey JÎTEMêko newe hereket kerdêne, labelê nameyê ci nîno zanayene.”
Îşkenceyê bi seyan kesan kerdî
Polîsî qiseykerdişê xo de nameyê dozgerê ke bi hawayo taybet amebî wezîfedar kerdene zî da û wina va: “Nameyê nê dozgeran Ruşen Guneş, Selman Eskîler û Fatîh Çakir bî. Nê dozgeran tehqîqatanê rojaneyî reyde eleqeder nêbîyêne. Tena dosyaya rêxistine de mudaxîl bîyêne. Reyna ekîbo ke 15 kesan ra pê ameyêne, emnîyet de îşkence kerdêne. No ekîb bitaybetî seba ke kesî ser endamanê HDPyî de îfade bidî, îşkenceyê bi desan kesan kerdî. Nê kesî wextê OHALî de bîyî sebebê tewqîfbîyayîşê bi seyan kesan. Bitaybetî qezayanê Wêranşar, Pirsûs, Xelfetî, Haweng, Sêwregi û Curnê Reşî de xeylê HDPyî wina tewqîf bîyî. Nê kesê ke bi no qeyde tewqîf bîyî, zafê înan hîna zî zîndan de yî.”
ANF / BRUKSEL