Ekînokse Payîzî de ‘EWRO’

Kovareke newî ya bi kirmanckî "Ewro" Ekînoksê Payîzî de destpa weşan kerd. Kovara Teorî, Huner û Edebîyatî “Ewro” bi hûmara xo ya yewîn û bi dosyaya “Mekan” çape bî, resya kitabroşan û destê wendoxan. Kovar Tîrêj ra heta Şewçila, rêç û bingehê kovarê ke safî bi kirmanckî vejîyenê ser o bi îmkananê lîjneya Kovarî vejîya. 

Kesê ke na kovare de ca gênê, hîna zêde teorî, huner û edebîyat xo rê kerdî bingehî, çunke gore înan ganî merdim verî qîymetê “çeku” fehm biko. Dima fikirîyayîş dest pêkeno. Derheqê mîyanok û konseptê "Ewro"yî de emegdaranê Kovarî cewab da persanê ma. 

Kovara “Ewro”yî destpa weşan kerd. Rîwalê naye ra ma verî şima bimbarek kenê. Wazenime bi persê ‘fikrê kovarêka winayî kotî ra vejîya’ destpa bikerê?

Ma zî seba eleqedarî û qîymetdayîşê şima zaf sipasî kenê. Verê persê şima ma wazenê çend çîyan zelal bikerê ke Kovara Ewroyî kovarêka bêrêçe nîya. Heta ewro hem kovarê ke safî bi kirmanckî hem zî tay zî bibo kovarê ke tede kirmanckî estbî vejîyayê heminan rayberîya ma kerde. Ma nê hetî ra Tîrêj ra heta Şewçila heme kovaranê şarê xo, xo rê sey bingeh vînenê. Eke ma persê şima ser ageyrê, ma waşt ke nê warî de keda ma zî bibo û ma paştî bidê kovaranê kurdan ke derheqê teorî û hûnerî de weşan kenê.

“Ewro” hetê çend kesan ra yena hadrekerdiş? Gelo ekîbêka xo ya xisusî esta?

Ewro xo mîyan de di lijneyan ra yena meydan. Nînan ra yewin lijneyê weşanî yo ke wezîfeyê xo hem nuştiş o hem zî nuşteyê ke teber ra yenê, înan ser o fikr û peşnîyazanê xo vatiş o. Lijneyê dîyin zî lijneyê redaksîyonî yo. Lijneyê redaksîyonî zî hetê ziwanî ra nuşteyan ser xebitîyeno û nuşteyan amadeyê çape keno.

Ma nê babedan zî mereq kenê; perîyodê kovarî senîn o? Do bi kamcîn rayîran bireso wendoxan?

Perîyodê kovare şeşmengane yo, yanî kovare şeş mengan ra reyêk vejîyena. Seba ke ma teşqele ra zêde wazenê karêko baş bîyarê ware, nika sey destpêkî ma do bi nê perîyodî hûmaranê xo vejê. Beno ke tayê embazî mereq bikê û pers bikê çira şima ekînoksan de vejenê? Ma waşt her hûmara ma serre de zemano ke şew û roje hukmê xo yewbînî ser ra vîndî kenê û hetê dergî ra benê seypê o wext vejê. Vilakerdiş û resayîşê kovare do zî hîna zêde keyepel û dikananê kitabroşan ser ra bibo.

Hûmara yewine bi kamcîn îmkanan û netîceyê kamcîn kede vejîyê?

Beno ke tayê kesê erbabê nê karan zî na babete de paştî bidê ma, kovarevetiş de karo tewr zor vetişê hûmara yewin o. Ma bi îmkananê xo vete. Embazê ke lijneyan de wezîfeyî girewtî xo ser, înan bi xo tûnika xo ra dayî û ma bi nê sermayeyî Kovara Ewroyî vete. Keda ke Kovara Ewroyî resnaye destê şima kedêka semîmî ya û menfeatê şexsî tede çinî yo. Wa Kovara Ewroyî bişo mesrefanê xo vejo û seke soz dayo şeş mengan de reyêk bireso destê wendoxanê xo bes o.

Muhtewaya hûmara sifteyêne ke bi dosyaya “Mekan” vejîyê zaf dekerdî ya. Çira tercîhêko winasî û çira “Mekan”, şima eşkenê tayê behsê ney bikerê?

Eke wendoxê ma yê ezîzî kovare bigîrê xo dest û bala xo bidê nuşteyan ser, ê do bivînê ke eslê xo de her çî bi fehmkerdişê mekanî dest pêkeno. Verê heme çîyan, eke merdim wazeno estbo ganî verî mekanêk peyda biko. Ma kurdî hetê mekanî ra problemanê pîlan mîyan de yê. Ma waşt hendo ke destê ma ra yeno nê probleman bîyarê rîpelan ser û biresnê şarê xo ver.

“Ewro” zey Kovarêka Teorî, Huner û Edebîyatî xo da silasnayiş. Çira sînorkerdişêko winasî? Gelo şima dê ca nêdê meseleyanê zey komelkî (civak), dorûvernasî (ekolojî), ekonomî û polîtîka?

Sînorkerdiş muhîm o. Merdim heta yew sînor xêze nêko hetê fikirîyayîşî ra merûzê cîya-cîya çîyan beno û to dî nêşa problemê xo yê bingehênî şirove biko. Ma, êyê ke na kovare de ca girewtê, hîna zêde teorî, huner û edebîyat xo rê kerdî bingehî çunke ma gore ganî merdim verî qîymetê “çeku” fehm biko. Dima fikirîyayîş dest pêkeno. Nîno a mana ke kurdan mîyan de problemê komelkî, dorûvernasî, ekonomîk û polîtîkî çinî yê! Kes nêşeno nînan peygoş biko la, seke ma va, ganî ma verî “çekuvatiş”î bimusê.

Seba wextê kilm û dergî hedef û vîzyonê Ewroyî de çi esto?

Seba wextê kilmî mîsyonê ma amadekerdişê hûmara dîyin o, la seba wextê dergî derd û kulê ma kirmanckî û şarê ma yo kurd o. Vîzyonê Ewroyî de tim averberdişê lehçaya ma ya şîrine û wasitabîyayîşê neqlkerdişê derd û armancê kurdan o.

Hona rew o la reyna zî wazena pers bikera. Şima reaksîyonê bi çi rengî girotî û gênê?

Ma roja yewine ra nat heme hetan ra reaksîyonêko pozîtîf girewt û xora no reaksîyono pozîtîf seba ma bi çimeyê motîvasyonî. Nê mabênî de ma wazenê kesê ke hem madî hem zî manewî paştî daye ma, înan heminan rê tek bi tek sipas bikerê û selam û heskerdişê xo înan rê bişawê.

Babeta weşangerîye de rewşa kirmanckî kişta şima ra seyî (çitûr, senî) ayseno? Goreyê şima averşîyayişêk esto?

Na vîst serra peyêne de kirmanckî, seke xo rê fekêk bivîno û bitazyîq xo bierzo erdî ser, winî sey çimeyêkê awe bî dîyar û roje bi roje verê xo kena şên û kewe. Tebî merhaleyo ke ma ha tede yê bes nîyo la eke hetê tayê neyaran ra fekê nê çimeyî nêro girewtiş no çime do nêpeyso û roje bi roje erdê xo bikero şên.

Tirkîya de îmkanê weşangerîya bi kirmanckî çiqas esto?

Birastî seba ke ma hewna newe yê nê warî de hendê kovaranê sey Vate û Şewçila nêşenê melumatêko baş bidê, la eke yew kes tay bo zî kurdkî de eleqedar o, zano ke Tirkîya de karê weşangerî wet de bimano kurdkî de eleqedarbiyayîş zî karêko cîdî û bimesulîyet o.

Eke mesajêk yan zî vatişêkê şima zewbîna bibo, fermo. Seba ke şima persanê ma qebul kerdê ma berxudarîya xo vanîme.

Ma seke destpêk de zî va seba ke şima eleqeyê xo nîşan da û waşt Kovara Ewroyî bi rîpelanê xo bidê şinasnayîş ma zerrî ra sipas kenê û şima rê serkewtiş wazenê. Ma heme şarê xo ra rica kenê ke Ewro yan zî sewbîna kovarêka kurdî ferq tede çin o, heminan rê wayîr bivejîyê, biwanê, bidê wendiş û vilabîyayîşê nînan de hetê weşangerîya kurdan bikê.

Peydakerdişê Kovara ‘Ewro’

Şima êşkenê enê ca û adresan ra Kovara Ewro peyda bikerê. 

AMED: 

* Kafka Kitabevi, Lise Cad. Erge Apt. No:22 (Ziya Gökalp Lisesi Karşısı), Yenişehir.

* Kafka Kitabevi, Diclekent Şubesi, Huzurevleri Mah. Urfa Yolu, Tesisler Kavşağı, Kayapınar.

l Aram Kitapevi, Konukevi Altı, Ofis, Yenişehir.

* İsmail Beşikçi Vakfı, Yenişehir Mah. Selahattin Yazıcıoğlu Cad. Oryıl Office A Blok N: 2/2, Yenişehir.

ÇEWLÎG: 

* Kurdî-Der, Cafe Psinge

SÊWREGI:

* Komeleya Ziwan û Kulturî (KOZIK)

DÊRSIM:

* Baran Kitabevi

ANQARA:

* Kurtuba Kitapkafe; Sakarya Cad., Bayındır Sok.1, Ankara, İmge Kitabevi

ÎSTANBÛL:

*Kurdî-Der, Medya Kitabevi

MÊRDÎN: 

* Leylan Cafe