Ceniyê Dersimij hedef kenê ke heta aşmanê hamnanî gureyinanê xo pêrokîn sûk de hera bikerê. Ekonomiya komunal Kurdistan de gam bi gam vila bena. Komîsyonê Ekonomî yê KJA badê Mersîn û Wan, Dersim de kî hîrê hefte yo destci gureyine kerd.
Cenî tim miyanê ekonomî de bî
Komuna EKO-JIN ke Pilûr de, bi potena (pewjiyayişê) nanî destci faaliyetan kerd. Azaya Komîsyonê Ekonomî yê KJA Songul Erden da zonayen ke, cenî her tim miyanê ekonomî de bî, la bi modernîteyê kapîtalîst ra piya ekonomî ceniyan rê amê giroten.
Erden aşkere kerd ke, bi ronayişê nê komunan ra piya wazenê ceniyan onca bikerê leteyê ekonomî û da zonayen ke “EKO-JIN, yeno maneya ceniya ekolojîk”. Erden behsê gureyînanê komunî kerd û niya va: Verikîn aşma Xizirî de ponc ceniyan nanê tenik viraşt, nika kî hîrê cenî gureyîne. Gureyê ma ke bi 3-5 ceniyan destci kerd wextanê vernî de ravey şino. Aşmanê hamnanî de ma dê hêgayan de tayn çîyan bikarê.
Gam bi gam komun bena vila
Songul Erden da zonayen ke, xêlê cenî paşt danê na proje û dewijî kî wazenê hêgayê xo piya bikarê, biçînê û bare bikerê. Erden diyar kerd ke, hedefê înan de qezenc kerdişê pere çinyo, îye wazenê sîstemekê zey kooperatîf ronê. Erden va, nayî ra ma verikîn komunê dew rona.
Erden da zonayen ke, komunî de her roj 200 nanî hetê 3 ceniyan viraziyenê û yenê roten û aşkere kerd ke, badê Pilûr Mêzgir de kî hadreyînê projeyê niyayî bikerê.
DÎHA/DERSİM