SÎLVA MISTEFA / ROZANA DAWÛD / ANHA / HELEB
Îdareyê Kongreya Starî yê Helebî konferansê xo yê dîyine ke aşma hezîrane de viraştbî ra dima, seba ke Şêx Meqsûd de ekonomîya cinîyan aver bîşêra, tayê projeyî eştbî pratîkî. Goreyê ê projeyan heme çîyî ra ver, verê cû derheqê madeyo esasî û resnayîşê merdiman de tayê qerarî girîyayî.
Bi nameyê ‘Kulîlka Çîya’ de cayêkê karî ame akerdene û ewja de kel-melê pakkerdişî yenî xelq kerdene. No ca hetê 3 cinîyan ra yeno îdarekerdene. Çîyê ke yenî xelqkerdene, bazaran de roşîyenî. Heto bîn ra depoya xidayê wişkkerdeyan ke eynî taxe de abîyo, kel-melanê xo roşeno cayê werdî. Tîya de 8 cinîyî xebetîyenî û tîya de şîranîyê namedarî yenî viraştene. Cinîyan ra Orîvan Mihemede va ‘ganî projeyê winasî zêde bibî, çimkî no seba taxe qezençêko gird o’.
Îdareyê Komîteya Ekonomîye ya Kongreya Starî ra Nehla Mistefaye zî va ‘cinîyê na taxe no şer de zehmetîyê girdî cuyayî’ û wina dewam kerde: “Bitaybetî warê ekonomîke de zaf zehmetîyî cuyayî. Labelê ewro hewl danî ekonomîya xo bi xo aver bîşêrî.” Ame musayene ke nê projeyî do seba Taxa Eşrefîye zî bierzî pratîkî.