CEBRAÎL ASLAN / PÎRHA / ANQARA
Aşma Muharremî ver bi seyan elewîyî ameyî têhet û loqmeyê rojeyî pare kerd. Ocaxê Arzumanî yê dewanê Yozgatî ra Pîr Îsmaîl Acar, Zakîr Esra Yalçin û Yakup Akdag zî beşdarê akerdişê rojeyî bîyî. Akerdişê rojeyî bi gulbangan ame akerdene. Dima ra qiseykerdişî ameyî kerdene.
Pîr Acarî muhîmîya aşma Muharremî ser o va ‘Fuzûlî hozananê şarî ra yo û tirbedarîya Hz. Huseyînî kerdo’ û wina domna: “Kam ke qala Îmam Huseyînî kerd û zerrîye ra bawerîya xo nêard, o munafiq o. Çimkî Hz. Huseyîn mîyanê 124 hezar pêxembaran de yê ke seba merdimîye xo feda kerdo ra yew o. Vera zaliman de hetê mazluman de ca girewto. Her ke qisey kerdo, qala huqûq, heq û edaletî kerdo. Alimanê tewr girdan ra yo.”
Qiseykerdişan ra dima parekerdişê loqmeyê rojeyî qedîya.