Vera xespkerdişê şaredarîyan û tayînbîyayîşê qayûman de reaksîyonêk zî elewîyan ra ame. Temsîlkaranê dezgehanê Elewîyanê ke şaredarîyê HDPyî zîyaret kerdî û piştî daye ci, vera qayûman de mesajê xurtkerdişê têkoşîn da.
Hemserekê Komeleya Elewîyanê Demokratîke (DAD) Mûstafa Karabûdakî va ‘ma Elewîyî qayûman baş şinasnenî û wina domna: “Qayûm asîmîlasyon o, şîdet o, xebatêka bêriza ya. Ma îtîqatê xo de qayûman wina şinase kenê. Îqtîdaro sîyasî Amed, Wan û Mêrdîn de çîyo ke sindoqan de dest nêfîna bi qayûman wazeno bigiro. Ma Elewîyî cimatê riza yê. Elewîyî zîhnîyeto ke îradeyê şarî xesp keno, çi rey qebul nêkerd. Ma kişta şarî û hemşaredaranê ke ameyî weçînayene de yê.”
Hetkarê serekê pêroyî yê Federasyonê Elewîyanê Bektaşî Muslum Metînî vera qayûman de reaksîyonê xo nîşan da û va ‘ma sey Federasyonê Elewîyanê Bektaşî kam ke raştê neheqîye ameyo, kam beno wa bibo ma hetê ci de yê.”
Ma na derbe qebul nêkenê
Serekê Pêroyî yê Komeleya Kulturî ya Pîr Sûltan Abdalî Ganî Kaplanî vist vîrî ke Elewîyan tarîx ra nata qayûman ra zaf antê û wina va: “Elewîyî qetîyen qayûman nas nêkenê. Qayûmî vera îradeyê şarî de xesp û hêriş ê. Qayûm derbeyeka sîyasî yo. Ganî ca de wezîfeyê şaredarîyanê ke hetê şarî ra ameyî weçînayene peyser bêrê dayene. Ma nê qebul nêkenê.”
Wazenî bi qayûman emrê xo derg bikerî
Endamê Merkezê Komeleya Pîr Sûltan Abdalî Ozgur Kaplanî zî bale ante hêrişê vera Elewîyan de benî ser û wina va: “Bi seyan serran o ke vera cuya ma de hewldayîşê qayûmî esto. Ne Kurdî û ne zî Elewîyî tewirê îradeyê şarî nasnêkerdişî yê AKPyî rê xerîb nêyê. AKP yo ke peynîya ci bîya nizdî bi nê hêrişan wazeno ke emrê îqtîdarê xo yê sîyasî derg bikero.”
ANF / ANQARA