DENÎZ NAZLIM / MA/ANQARA
Mudurîya Asayîşî ya Anqara derheqê Velî Saçiliko ke bîyo sembolê çalakîyê ke Cehdeyê Yukselî de yenî viraştiş de notê melumatî yê ke 78 rîpelan ra pê yenî erşawite Serdozgerîya Anqara.
Notê melumatî de parekerdişê medyaya komelkî û roportajê Saçilikî zî seba endamê rêxistine bîyayene rê suc hesibîya. Notê ke erşawîyayî mîyan de ameyo îdîakerdiş ke mabênê serranê 2000 û 2016î de Saçilikî mîyanê rêxistina MLKPyî de ca girewto, labelê badê ke Saçilik îxraç bîyo ra dima zî bi endamanê DHKP-Cyî reyde kewto têkilî.
Labelê seke yeno zanayîş Velî Saçilik serra 1995î de seba ke Anqara OSTÎM de vilawekî vila kerdbî, amebî tewqîfkerdiş û 3 aşmî ra dima tehlîye bîbî. Labelê netîceyê mehkemebîyayîşî de 2 serrî û 6 aşmî ceza girewtbî. Saçilik reyna erzîyabî zîndan û netîceyê operasyono ke vera Zîndanê Burdurî de amebî kerdiş de polê ci amebî qerfnayîş û serra 2002î de zî beraat kerdbî. Dima ra ame îdîakerdiş ke propogandaya PKKyî kerdo, labelê netîce nêamebî girewtiş. Saçilikî babete ser o wina va: “Eke têkilîya mi bi rêxistine esta, o wext mi senî tehqîqatê ewleyîye derbaz kerd. O wext dêmek polîs paweyê 15ê Temmuze vindeto. Polîso ke 14 serrî dewlete teslîmê cematî kerdbî, mi taqîp kerdo. O wext madem îstîxbaratê to baş xebetîyeno, çira to derbe zamayê xo ra musayî? Heta nika derheqê mi de hende doze akerdî, yewe zî raşt nêvejîya. Nika Yuksel de zî wina kenî, do reyna şaş bivejyî.”