Eren Dersim ra heta Wan, Mersîn ra heta Enqera sûkanê kurdistan û tirkiye de yad bi.
Ser mezelê xo de yad bi
Eren Enqera de, ser mezeleyê xo de ame vîrarden. Bi seyan kesê ke, mezelxaneyê Karşiyaka de amey are bî, bi posterê Eren heta qebrê ci rayşî. Azayê Gencanê EMEK ra Dîlan Ortakçi merasîm de qisey kerd û vistvîrî ke, zihnîyetê 12ê Îlone dewam keno. Ortakçi va, ma jew bimirê zî, ma dê hezar za bibê. Merasîm de sozê berzkerdişê tekoşîn ame dayen.
12ê Îlone bi AKP rameno
Merasîmê yadkerdin yê Dersim de vajiya ke, yê ke vizêr emrê Erdal Eren kerdî gird û îdam kerdî, ewro zî werteyê kuçeyan de domanan, gencan qetil kenê.
Merasîma vîrarden yê Dersim kuçeyê Senat de destkerd ci û heta çarşiyê bin erdî dewam kerd. Rayşiyîn de sloganê ‘12ê Îlone bi AKP rameno’ berz bi. Gencanê Partiya EMEK ra Sercan Încesû qisey kerd û vistvîrî ke, rixmo ke, 35 serrî vêrdî ra, rejîmê antîdemokratîk yê 12ê Îlone bi îxtidarê AKP û Seray rameno.
Kuçeyan de domanan kişenê
Încesû vistvîrî ke, zihnîyetê îdamkerdin, kuçeyanê kurdistan de gencan qetil kena û aşkere kerd ke, yê ke vizêr emrê Erdal Eren kerdî gird û îdam kerdî, ewro zî werteyê kuçeyan de nêweynenê emrê ci, domanan, gencan qetil kenê. Încesû hayr ant qetilkerdişê Tahîr Elçî ser û ard ziwan ke, zey serranê 90î hiqûqzanî werteyê kuçeyan de yenê înfazkerdin.
Erdal Eren herzewbîn sûkanê Mersîn, Wan, Edena de zî bi merasîman ame vîrarden. Pêrokîn merasîman de hayr anciya nêvurnayişê rejîma faşistîn yê tirkiye ser.
DÎHA