Erdogan vat bi: “Kobanê kewt û bikewo.” No vatişê Erdogan daxî bêomidî nîşan dana. Kobanê bi rojanoke verba çeteyê DAIŞî têkoşîn danê û seba na têkoşînî zî rojawijan heme keştîyan xo day adirê.
En peynî Kurdistan, Tirkîya, Ewropa û heme pêroyina dinyayê topyekun serehewanayişê destpê kerd û nê serehewanayişan zî kîmyayê Erdogan xirap kerd. No ser zî aşkerayê zey ‘Kobanê kewt û bikewo’ vila dana, yanî zerrîyê ey ra çi vîyareno se no peyamê dana. Vano vano la her ke şona omidî ey vîndî bena.
DO HESRET BIMANO
Erdogan waştekê do kurdan vînbikerê û ey zî keyfweşîyek biciwo la belê no xeyalê ey raşt nêbo û no ser zî xeyalê ey heme xirap bîyê û nê vatişê ey, kerbî ey mojnenê. Erdogan bi vatişê xo tena bi DAIŞî hembarîya xo nîşan nêdano, vînkerdişê kurdan û kewtişê Kobanê wazeno la belê seba ke no waştişê ey raşt nêbî, nika bi kerbî qise kena û keyweşîyê zî kursagê ey de mend.
Hîna sere kar waştişê Erdogan û serekwezîrê ey stratejîk zaf bi ferq bîyê. Înan fikrîyaynê ke bi hetkarîya dewletê heremê û destekê Tirkîyayê DAIŞ Kobanê hêriş bikero û Kobanê dest ser bikero, peynî zî do Kobanê bikewo û bihezaran kesî sînorê Tirkîyayê bêrê û artêşê Tirkîyayê zî zey artêşê xelisnakar bivejo meydanê la no rewş nêqewimya.
Erdogan çi çax serekkomar sifteyin şoko di noca de cuya. Çimkî Erdogan guya bi îdiaya ‘Rayverê dinyayê’ no kaykerdişê telukeyê îmze eşt la belê xoverodayişkarê kurd no planê Erdoganî darbeyeke gird day piro û heme polîtîkayê kaykerdişê Erdoganî deşîfre kerdî.
DINYA NÊWAZENO
Erdogan peynîya hêrişê Kobanê yê DAIŞ di Heyeta Pêroyina Neweteweyê Pêrabesteyî de yew qise kerd. Cayeke Erdogan qise kerd, di no salonê zaf hûmarîy de rayver qiseyê dîrokî kerdbî la çi çax ke Erdogan vejîya ser kursîyê heme rayverê dinyayê salonê terk kerdî û Erdogan salonê vilayê ra qise kerd.
No rewş Erdogan ra peynîya Çankayayê şokê diyin bi, çimkî di NPê de heme rayverê dinyayê aşkera vatê ke dinya Erdogan nêvazeno û Erdogan nika ra pey rayverekê serxo yo. Semedê vila bîyîşê salonê zî Kobanê bi. Erdogan di New Yorkî de heqeret kerdî la belê eynî demî Kobanê ra zî xebereke waştê nêameynê. Çeteyê DAIŞ bi wekaletê Erdogan verba kurdan şer kerdî la belê nê çeteydan nêşkeyayê hêzê kurdan YPG/YPJ serfiraz bibê.
Eke Kobanê bikewtî û DAIŞijan do Kobanê serwer bibîynê do Erdogan kombîyayişê YPê ra bi rayvereke hêzdar beşdar bibîynê û verba çeteyê DAIŞî di koalîsyonê de cayeke rind xo ra bigirewtî la xeyalê Erdogan kurdan bi têkoşîna xo vila vetî û Erdogan salonê vilayê ra qise kerd û Tirkîya nêşkîya di koaslîsyonî de cayeke rind xo ra bigiro.
Erdogan bi lezî wazena Kobanê bikewo û no ser zî nê çeteyê DAIŞî yê bê esilî ra hetkarî dana, dema ke Erdogan no planê xo anena cayê xo virkerdake serekkomarê yew welatî yo û Erdogan wazeno ke çeteyê DAIŞî qirkerdişeke gird bîyarê cayê xo.
Merdim en peynî eşkeno bivajo ke waştişê Erdogan do qursagê ey de bimano do Kobanê nêkewo zî la kesekê bikewê est ê. Do kesekê çeteyê DAIŞî reyde hembarî kerdî dîyarê û bê ceza nêmanê. Zatî Meclîsê Parlamenterê Konseyê Ewropayê zî no ser biryar girewt û heme hemkarê DAIŞ û çeteyê DAIŞî Dadgeha Sûcê Merdimatî ra bêrê daraznayiş. Ecaba vatişê Bîdenê no biryarê Meclîsê Parlamenterê Konseyê Ewropayê ra finak nêbî.
CAHİT MERVAN/BRÜKSEL