Îlanbîyayîşê OHALî ra dima heta nika pêro pîya 135 hezar merdimî karî ra ameyî îxraçkerdiş. Na çarçewa de 120 hezar kesî ameyî tepiştiş û nînan ra 60 hezar kesî tewqîf bîyî. Reyna heta nika 150 ra zêdeyêr dezgeyê medyayî ameyî padayîş, 160î ra zêdeyêr rojnamegerî tewqîf bîyî û bi hezaran rojnamegerî zî bêkar mendî. Herçiqas ke bîlanço wina yo, reyna zî goreyê Serekkomar Erdoganî OHALî ra ti kesî zirar nêdîyo.
Babete ser o Sereka Şûbeya Stenbolî ya Komeleya Heqê Merdiman (ÎHD) Gulseren Yolerîye qisey kerde. Yolerîye va ‘ti kes ehmeq nîyo û herkes heme çîyî vîneno’ û wina dewam kerde: “Nika herkes zano ke nizdîyê 60-70 hezar kesî OHALî ra dima ameyî tewqîfkerdiş. Hema vaje her keye ra kesêkî tewqîf bîyo. Wayîrê ti meslekî nêşeno karê xo bikero. Serekkomar û îqtîdar şarî gênî binê zapturaptî. Îqtîdaro ke herkesî tehdît keno esto û reyna zî vano ‘ti kes mexdur nêbîyo’. No nizdîbîyayîşêko ecêb o û nîno qebulkerdiş.”
Nîşaneyê tersê îqtîdarî yo
Yolerîye dewamê qiseykerdişê xo de va ‘Tirkîya de OHAL reyêkî de nêerzîya dewre’ û wina domnaye: “Heta 7ê Hezîrane îxlalê heqan kêmî bîybî. No proses de îqtîdar hêz vînî kerdbî. Eynî wext de hêrişkarîya îqtîdarî zî no proses de zêde bîye. No proses de bajarî ameyî rijnayîş, merdimî ameyî qetilkerdiş û pêla şerî êdî êdî berz bîyêne. Eke komel hema zî wayîrê xo nêvejîyo û reaksîyonêko xurt nîşan nêdo, o wext rewşe do hîna giran biba. Îqtîdar yan bi tersnayîş hewl dano komelî teslîm bigîro, yan zî hende zulm û zextî nîşaneyê tersê îqtîdarî yî.”
MA/STENBOL