Malbatê şehîd Rozerîn Çukur, Turgay Gîrçek, Gunduz Akmeşe, Ramazan Ogut, Cîhat Morgul, Mehmet Oruç, Erhan Keskîn, Hakan Arslan, Welat Bîlen û Erdal Tekîn 3 aşmî yo ke pawenî cenazeyê domananê xo bigêrî û seba nay Navenda Kultirê Dîcle Firatî de nobet gênî. Tewr peynî Sûr de 7 cenaze ameyî vetiş û tay malbatî fikiryenî ke cenazeyê domanê înan bibî û seba ci serpirodayişê dozgerî day, labelê dozgerî verê malbatan şertê îmzeyê belgeyî (azayê rêxistina terorî û pêkewtişî de merd) vet.
‘Domanê ma terorîst nîyê.
Babete ser pîyê Rozerîn Çukurî, Mustafa Çukur aşkera kerd ke ê seba girewtişê 7 cenazeyî sere dayî dozgerî ro, labelê dozgerî de wêneyê ke înan ra ameyî nawitiş, nê wêneyan de cenazeyî nêameyî şinasnayîş û wina vat: “Ma ra vatî; ganî şima belgeyê ke ‘domanê ma terorîstî yê’ îmze bikerî la ma qebul nêkerdî. Na ray zî ma ra vatî; eke şima wazenî ma şima rê hetkarî bidî, nê belgeyan îmze bikerî la ma nêçare nê belgeyan îmze kerdî.
Him kişenê, him zî terorîst îlan kenê
Dayîka Cîhat Morgulî, Kadrîye Morgul zî da zonayen ke, înan bi vatişê ‘eke şima îmze nêdî ma dê babeta domananê şima de şima rê hetkarî nêdî’ tehdît kerdiyê. Morgul va, no 3 aşmî yo ke hewl danê ke biresî leteyê domananê xo.”
Dayîka Ramazan Ogutî, Elîf Ogut zî aşkere kerd ke, waştî belgeyê ke domanê înan zey terorîst damusnenê bidê îmze kerdiş û va, esil Erdogan, lejkerê ey û dewlet terorîst a. Dayîka Rozerîn Çukurî, Fahrîye Çukur zî vist vîrî ke hem kişenî hem zî terorîst îlan kenî. Çukur dîyar kerd ke ê tesilî no muameleyî qebul nêkenî, domanê înan zî terorîst nîyî û hetanê girewtişê cenazeyê domanê xo ê dê têkoşîn bidî.
JINHA/AMED