Abtanî va Kurdistan de zext û tedayê girdî estî û dewam qiseykerdişê xo de wina va: “Tirkîya bi zext û tedayan resaya hedefê xo. Ma nê semedî ra Kurdistan de yî. Yanî seba ke çîyê ke yenî ciwîyayîş, bikirêşî Ewropa. Ez na rewşe ra zaf tesîr bîya. Şarê kurd dejanê xo îfade keno, la kerbê xo nîşan nêdano. Ma do waştişanê şarê kurdî warê mîyaneteweyî de bîyarî ziwan. Ma çîyê ke Nisêbîn de qewimîyayî, dîye û ma do hewl bidî nînan bidî vindarnayîş.”
Ma do sansurî wedarnî
Abtanî bale ant padîyayîşê Med Nûçe Tvyî û kanalê muxalîfî yê ke Tirkîya de yî û va: “Sansur polîtîkayê dewlete yo. Wazenî çîyê ke tîya de yenî ciwîyayîş, nêrî dîyayîş. Ma agêrenîy Ewropa û seba wedarnayîşê sansurî çi destê ma ra bêro ma do bikerî. Çimkî çîyo ke ganî Ewropa bikero, temaşekerdişê polîtîkayanê Erdoganî nîyo, piştîdayîşê têkoşînê demokrasîye yo.”
Aştîye bi veredayîşê sîlehan nêbena
Abtanî dewamê qiseykerdişê xo de prosesê şerî û vengdayîşê Rayberê PKKyî Abdullah Ocalanî zî ard ziwan û va: “Pêameyîşê aştîye yê Kolombîya, eşkeno Kurdistan de zî bêro viraştiş. Wa sîlehî bêrî veradayîş, la bi domîyayîşê tedaye aştîye nêbena. Ma vînenî ke hukmat her ke şono beno totalîter. Erdogan babeta bextwaştoxan ser ra Ewropaye rê şantaj keno û no şantaj nîjadperestîya Ewropaye ve kar zî keno. Kurdistan de şar her çiqas ke merdimanê xo vîndî kerdo, reyna zî bi hewayo rûmetin payan ser de vindenî.”
DÎHA / AMED