Serekkomar Erdogan çend rojî verê rasteyan de vatbi ‘ma do statuyê cemxaneyan bişinasnî’ û bi no hawa hewl dabi rayanê elewîyan bigîro. Vatişê Erdoganî ver her ke şono reaksîyonê elewîyan zêde beno. Babete ser o Komeleya Kulturê Pîr Sultan Abdalî (PSAKD) Ganî Kaplanî beşdarê şewa piştîdayîşyewbînanî bi û ewja de qisey kerd û reaksîyon nîşanê vatişê Erdoganî da. Kaplanî va ‘xebatê weçînayîşî dest pêkerdî û îqtîdar û muxalefet deklarasyonê xo yê weçînayîşî aşkere kerdî’. Kaplanî dewamê qiseykerdişê xo de qala îzehetê Erdoganî kerd û wina va: “Ma dezgeyê elewîyan, nê îzehetî qebul nêkenî. 16 serrî yo ke ti nê welatî îdare kenî. Çira to heta nika nê statuyî nêda? No zî yeno manaya ke zaf kewto tengasî. Program û mîtîngê serekkomarî temaşe bikerê, Serekkomaro verên nîyo. Medyaya ma çin a, çapemenîya ma çin a. Cok ra ganî kesê ke tîya de yî, sey dezgeyêka medyaye bixebetyî û ber bi ber bigêrî. Erdogan şono û şîyayîşê ci destê ma de yo.” Qiseykerdişan ra dima şewa piştîdayîşyewbînanî bi muzîk û govende qedîyaye. MA/MELETÎ