Seweta qabê weçînayişê azayanê dewrê 25. yê meclîsî, 7’ê Hezîranî de 56.6 mîlyonî weçîntoxî dê şirê ser sandiq.Netîceyê îstatîstîkê anketan Erdoğan’î û hikûmet kenê hêrs û har. Çi ke nê îstatîstikî binkewtişê reyanê AKP damisnenê. Cok ra Erdoğan’î û orkestraya ci destpa dayişê fermanê hêrişkerdinê HDP day. Erdoğan’o ke ver serkewtişê HDP de bêçare mendo her qiseyê xo de HDP û azayanê ci hedef damisneno, heqaretê Kurdan keno. Quran giroto destê xo û meydanan de çerxneno. Yanî Erdoğan dîn-îtiqatî keno hacet-amûrê menfaatê xo û gunayê gird keno. Quran de yeno vaten ke, e ke jew welatî de îxtidar zilm bikero, gerek homet a îxtidarî rê îsyan bikero.
Çima Erdoğan niya terseno? Çi ke serkewtişê HDP yeno maneyê destpakerdişê binkewtişê AKP. Serkewtişê HDP vinîkerdişê Erdoğan’î û xeyalê ci yê sîstema serokwezîrtî yo.
Nayî ra, Erdoğan û AKP veriya weçînayinan verra şarê Kurd fina-reyna herb îlan kerd. Her roj verra buroyanê HDP yê weçînayin hêrişê faşîstîn benê, gurekarê weçînayin yê HDP raştê hêrişî yenê. Winî ayseno ke nê hêrişê faşîstîn dê heta weçînayinan dewam bikerê. Çi ke nê hêrişî hetê hikûmet yenê organîzekerdin. Kesê ke hêriş kenê merdimê dewlet ê, gurekarê Erdoğan’î yê. AKP veriya weçînayinan 20 hezar polîsan Kurdistan de wezîfedar kena. Reîs-cumhurê dîktator, serokwezîrê Tirkperest û pîyonê bîn yê AKP azayanê HDP û weçîntayoxan tehdît kenê û her qiseyanê xo de waştena ver dêsê weçînayin de mendina HDP anê ziwan. La nika ra, him meydanî, him anketî, him zî atmosferê siyasî û yê weçîntoxan damisneno ke HDP dêsê weçînayin rewna ra welişna yo. Xo ra vejya teber ke weçînayinanê reîs-cumhurî de HDP se ra se û des û jû rey girotiyo.
Netîceyê nê weçînayinan dê xeylê çî zelal bikero. Nê weçînayinî dê meseleya Kurd ra piya qederê Tirkiye zelal bikerê, mîladê da newî akerê. Weçîntoxî îyê dê qerar bidê ke welatê do senî, sîstemê da senî wazenê. Nayî ra, weçînayinê 7’ê Hezîranî, dê mavêna partiyan nê, mavêna didi cepheyan de ravêrnê. Welatijî ê dê qerar bidê, jû îxtidara tiritox-xirxiz, zûrker, dîktator û faşîstîn wazenê, ya zî sîstemê da azadîwaşt û demokratîk wazenê, dê tercîxê xo bikerê. Xo ra nika ra, yê ke pey dawaya serbestî de rê, nika ra bin bana HDP de are biyê. Pêrokîn çormeyê ke hetê dewlet neway serriyo ameyê înkarkerdin û kişten HDP de qûwetê xo kerdiyê jû. HDP biyo zey meclîsê pêrokîn şaranê Mezopotamya û Anatoliya. Bi HDP ra piya na coğrafya yî de kiltûrê demokrasî ravêrşino, vengê bindestan gam bi gam beno berz.
No veng Erdoğan’î zaf tersneno. HDP hewnê Erdoğan’î remneno. La Erdoğan se bikero zî endî nêşeno verniya HDP bigîro. Çi ke HDP şar o û bahdo ke şar werziya ser payan kes nêşeno vinderno. Cok ra Erdoğan çi qe vajo ‘meseleya Kurd çinya, maseyê muzakere çinyo’ zî, hikmê na polîtîkaya ci çinyo. Çi ke endî wextê sîstema faşîstîn, dîktatorî, antî-demokratîk, yanî wextê AKP qediya. Nika wextê şaran, rengan, demokrasiyan o, wextê HDP yo.
Nika herkes jû fekî ra vano, AKP pey provakasyonan de yo. La ez vana çiyê ke benê provakasyon nê, destpakerdişê herbî yo. Vatişê ‘maseyê muzakere çinyo’ yê Erdoğan’î niyet û pêrokîn polîtîkayanê hikûmet beyan kenê. Wextê do derg o pêdiyayinê heyetê Îmrali bi Rayver Apo yenê manîkerdin. Zihnîyetê faşîstîn onca dewre de yo. Operasyonê eskerî onca-fina destpa kerdî. Nayî ra, endî AKP merhaleyê provakasyonî ravêrna û startê herbî da. Gerek şarê Kurd zî goreyê no dirûmî pozîsyon bigîro. AKP weçînayinanê 7’ê Hezîran’î zî zey herb vînena û xo bi pêrokîn sazgeh-dezgeh û qûwetanê dewlet hadre kena. Gune pêrokîn weçîntoxî bi na zonayiş xo hadre bikerê. Tenya reydayiş nêbeno. Gune herkes wayrê reya xo bivejyo. Çi ke rey îradeyo.