Paytextê Ermenîstanî Erîvan de semedê paştdayîşê xoverdayoxan ê ke semedê wedartişê tecrîdê serê Rayberê Şarê Kurdî Abdullah Ocalanî grevê vêşanîye de yê mîtîngêk ame viraştene.
Paytextê Ermenîstanî Erîvan de rayberîya Yewîya Cinîyan a Azadan (YJA) û Komîteya Kurdistanî de semedê paştdayîşê xoverdayoxan ê ke semedê wedartişê tecrîdê serê Rayberê Şarê Kurdî Abdullah Ocalanî grevê vêşanîye de yê mîtîngêk ame viraştene.
Leyla bîya sembolê xoverdayîşî
Çalakîya ke çapemenîya Ermenî bi eleqeyo gird teqîp kerd, Mesajê YJA’yî yê Roja Cînîyan a Kedkaran a Dinya ame wendene.
Mesaj de ame vatene ke her cayê dinya de cinîyî vera hêrişan vejîyenî meydanan. Azadîye bi mucadeleyo organîzekerde yena. Têgêrayîşê Cinîyan ê Kurdan bi nê zanayîşî gamê girdî eştî û ewro cimatî rê rayberîyo keno. Xêtê xoverdayîşê Roza Luksembûrgan ra heta Emma Goldmanan, Sakîneyan ra heta Zîlanan, Berîtanan ra heta Îvana Hoffmanan ma heta ewro ameyî. Û ewro cînîyêka bine… Leyla Guvene bedenê xo semedê cuyeya azade feda kena û bîya sembolê xoverdayîşî.
Azadîya Ocalanî azadîya şaran a
Bado zî bi nameyê Yewîya Kurdistanî ya Ermenîstanî parlamenter Kinyaz Hasanovî qisey kerd. Hasanovî vist vîrî ke rayberîya Leyla Guvene de xoverdayîş vila beno û veng da ke nê xoverdayîşî rê wayîr bêro vejîyayene.
Hemsereka Komîteya Kurdistanî Jênîka Qadîr zî qiseykerdişê xo de bale ante muhîmîya rolê Ocalanî ser û va: ‘‘Ez şexsê Leyla Guvene de xoverdayîşê cinîyan ê Kurdan fîraz kena.‘‘
Bi nameyê Meclîsê Şengalî Silo Dirboyanî zî ard ziwan ke Kurdî xoverdayîşê estbîyayîşî danê û şarî sîstemê verênî qebûl nêkenî û vat ke azadîya Ocalanî azadîya şaran a.
ANF / ERÎVAN