No sernuste seweta siyasetvananê hukumatê tirkî nuşiyo. Hefto peye mi Rojavayê Kurdîstanî ser nusna bî û vat bî “sima hona zaf postalu lêsenê.”

Mavên ra hona hefte ranêvêrd, sermiyananê dewleta terorîste derheqê Rojavayê Kurdîstanî de fikrê xo vurna. Hukumatê tirkî hemserokê PYD Salîh Muslum silayiya Tirkiye kerd.
Tabî, nî avêberdîsê niyanen rind yê, siyasetvanîke samîmî bê, haştiye rê xizmete kenê. Hama çi esto, ke siyasetvanê tirkî mentalîta xoya xiravine nêvurnenê.
Salîh Muslum xorê kenê meyman, wastîsanê xo bi zonê dîktatoriye anê zon. Guna yê çapemeniya tirkî bo, Salîh Muslum ra niya vato:
1-PYD gune lewê rejîma Esad de ca mecero!
2-Hatake qomê Suriye bi weçînîtîs parlamentoyo newe wenêçînît, emirvakî tewa nêbeno, yanî kilmek kurdî nêşîkînê xoseriya xo îlan bikerê!
Siyasetvanê dewleta terorîste mexmuriye kenê. Waxto kan de mendê. Vurnayîsêke dîna de benê, hona tam famnêkerdê. Hona zî vanê “niya mekerê, hen mekerê!”
Dîna de vurnayîsî hen herbî, hen pêt benê, ke hîrê mordemî sono.
Desmala xo dardekena, tewraniye nînan cena, tikenê, recefînê.
Hona zî Renganê kurdan qebul nêkenê. PYD herdê xo sero desmala xo darde kerda, Anqara de qarnaşî qotik kewtî zerrê hukumatê tirkî.
Se ke boxe desmasla sure vîneno, beno har verdano matadorî dime, siyasetê dewleta terorîste yê verva renganê kurdan zî hen yo. Qayde kunê.
Siyaset û siyasetvanê dewleta tirkî mejburî mendê, fikrê xo hebe vurnenê, hama mentalîta xo ya faşîste nêvurnenê.
Çapemeniya tirk zî nusnena: “ MÎT Salîh Muslum hesna pê” û nêzon çi...
Hallo! Pêhesnayîsê sima endî marê fasa-fîso yeno. Mexmuriye mekerê!
Waxtê hukmê to endî vêrdo ra! Dermanê to ke esto kir û keçelê xora ke!
Kurdî seweta xelesa xo kamî de piya gureyenê, verva kamî danê pêro, key xoseriya xo îlan kenê, teyna kurdî qerar danê.
Eke dostiye û cîraniye wazena, pêro kurdan ra seweta kerdena xo, kerdena pî û kalikanê xo lêborîne biwaze!
Hukumato tirk vişiya pêro, çike Rojavayê Kurdîstan de rêxistina El Nusra darbe gurete. Dewleta terorîste eskera poşt dênê û dana na rêxistina terorîste. Şilpaxake YPG Rojavayê Kurdistan de dê El nusra ro, aynî waxt de da hukumat û dewleta terorîste ro.
Serbestiya kurdan rojava ra dest kena ci, naca ra vilayê bakur, başur û rojhilatî bena.
Anqara se kena va bikero, endî nêşîkîna vireniya esqê serbestiye yê kurdan bijero.
Ma gune Rojavayê xorê wayîr vejîme, çike tîja ma na het ra bena berz.