No hêrişî de 3161 kes ameyî qirkerdiş, 5950 kes amey remnayîş, sere de navenda şaristanê Şengalî de 170 ca amey vengkerdiş û 460 hezar êzidî kewtîy ser rêya koçkerdişî. Demo qirkerdişî de hêzêy gerîla yê HPG, YJA Starî û şervanêy YBŞ û YPJ-Şengal bi se hezaran merdiman Koyê Şengalî de xelas kerdîy û înan resnay heremêy bi asayîş.
Tewr peynî têrey de
Şahidanê qirkerdişî ra rayîrberê Tevgerê Êzidîyan a Demokratîk û Azad (TEVDA) Munzur Dêrsim weyra de çîyo ke dîy wina ard ziwan: “DAIŞ di şanê ‘2-3’ê temmuzeyî de hetê Baacî ra hêrişî Gir Zerik, Siba Şêx Xidir û Til Zêr kerdîy û no hawa dîy ke hêzo ke hemverê înan çî yo. Semeda ke dîy ke hêzo ke hemverê înan de şer bikero çin o, rojekî ra pey hêrişî Şengalî kerdîy. Dezgeya ma ya TEVDA, dezgeyo ke tewr peynî Şengalî ra vejyay. Ma hemînan bi çimanê xo dîy. Nêy DAIŞijî, hêzêko wirdîlek ya ke Şengalijan ra pêk ameynê bîy. Xora ma nînan ra tayînan nas kerdênê. Cilanê DAIŞijan xora daybî û wina hêriş kerdbîy. Ger ke hêzo ke Şengalî bipawo bibîynê aye wext hende rehet Şengal nêkewtênê.”
DAIŞî rê veraday
Fermandaranê YBŞî ra Serxwebûn Cevahîr ard ziwan ke înan hêzêy pêşmergeyan ra çek û cebilxane waşt, labelê hêzêy pêşmergeyê ke remay, hetkarî zî nêda înan û wina vat: “Ma dijî DAIŞî şer kerdênê la pêşmergeyan yew fîşek zî nêteqnay. Ma înan ra persay ‘şima qey fişekan nêteqnenîy’ înan ma ra vat ke birayarek no hawa ya hukimata Başurî çin o. Ma vat aye çax çekanê xo yê giran bidê ma, ma rê biverdê la aye zî qebûl nêkerdîy. Dima zî navenda Şengalî de 70 tank, top, dokça û çekêy giran DAIŞî rê verday û şîy. Înan bi xo ser nêy çekan alê DAIŞî leqnay. Bi aye zî nêmendîy, DAIŞî rê aw û non verday.”
Tersa gird virazya
Cevahîr dîyar kerd ke tirseka gird şarî de virazyayo û wina vat: “Wexto ke şarî dîy ke hêzêy ke înan bipawo remayî na semed ra şarî zî verê xo day koyî. Tirs û panîkek gird şarî de virazyaybi. Ma hewl da ke moral bidîy şarî û tersa înan bişkinîy. Aye çax Şehîd Canpolat semeda ke moral bido şarî warîşt ala PKKî koyê ser leqna. Wexto ke Canpolat Barê-Şîlo de şehît kewt zî vatênê: ‘Ez deyndarê şarê êzidî ya’ pêşmergeyan wexto ke remaynê şarî sero zî gule varnaynê, semeda ke wa şar teslîmê çeteyan bikîy wina kerdênê.”
BAHOZ AMED- KURTAY SERHAT / ANF/ŞENGAL