Kongreya Komelê Demokratîke ya Kurdistanijê ke Ewropa de yî (KCDK-E) derheqê 10ê Kanûne Roja Heqê Merdiman ya Dinya de îzehetêko nuştekî daye.
KCDK-Eye îzehetê xo de dîyar kerdo ke hîna dinyayêka ser esasê azadî û heqan de awan nêbîya û wina va: “Hîna nîjadperestî, ziwan, dîn, mezhep û bawerîyan ser de zextî dewam kenî. Têkoşînê neteweyê ke erd û welatê înan ameyî xespkerdiş, dewam keno. Şeranê girdan ver krîzê gerdunî dewam kenî û têkoşîno ke seba azadî û aştîye yeno dayîş zî dewam keno.”
KCDK-Eye dewamê îzehetê xo de vato ‘herinda çareserkerdişê problemê kurdî, bi jenosîd û qetlîyaman hewl danî kurdan bipelçiqnî’ û wina dewam kerdo: “Nê polîtîkayî problem hîna zaf giran kenî. Herinda tecrîdo ke Rayber Apoyî ser de wedarnî û problem çareser bikerî, tecrîd û zextê giranî yenî domnayîş. Ewro Rayber Apoyo ke temînatê çareserî û azadî yo, gênî binê tecrîd û zextan, bi no hawa pêrodayîş û bêçareserî kûr kenî. Dezgeyê mîyanneteweyî, Konseyê Ewropa û CPT mîyanê bêvengîye de yî. Na bêvengîye û dirîtî hêrs û kînê şarê kurdî hîna zêde kenî.”
KCDK-Eye îzehetê xo de bale anto hewldayîşê Ocalanî yê aştîye ser û wina vato: “Rayber Apoyo ke hêvîya Kurdistan, Tirkîya û ya Rojhelato Mîyanênî yo, herinda nakokî û pêrodayîşî de bi paradîgmaya neteweya demokratîke, hewl dano çareserîya ke azadîya bawerîyan, cuya ortaxe û seypê û îstîkrarî esas gêna, pêşkêş bikero. Cok ra esasê tekoşînê ma weşî, ewleyî û azadîya Rayber Apoyî yo. Ewro seba azadîya Rayberê Şarê Kurd û hepsîyê ke zîndananê Tirkîya de raştê muameleyê teberê merdimîye yeno, têkoşîn dayîş, wezîfeyê kes û dezgeyê ke seba heqê merdiman têkoşîn danî yo.”
Seba çalakîyan vengdayîş
KCDK-Eye peynîya îzehetê xo de qala muhîmîya çalakîyê ke do 9ê kanûne de bêrî viraştiş kerde û wina qedênaye: “9ê kanûne de do Almanya, Îskandînavya, Fransa, Hollanda, Belçîka, Avusturya, Yewnanistan, Îtalya, Kibris, Kanada, Japonya, Avustralya û Îngilistan de dûştê eyalet û welatî de bi siloganê ‘seba Birêz Ocalan û Heme Hepsîyanê Sîyasîyan rê Azadî’ do meşîyayîşî bêrî viraştiş. Ma na çarçewa de veng danî heme demokrat, roşnvîr û muxalîfan ke wa beşdarê nê meşîyayîşan bibî.”
ANF/BRUKSEL