Edîtorê Med Nûçe TVyî Bakî Gulî derheqê padîyayîşê televîzyonê Med Nûçe de va şîrketê EUTELSATÎ ruşveto ke Tirkîya dayo qebûl kerdo û bi no hewa bîyo ortaxê hêrişanê Kurdistan, Parîs, Şengal û Brukselî.
Televîzyonê Med Nûçe TV û Newroz TVyî bi talîmatê Tirkîya, hetê EUTELSATî ra ameyî padayîş. Bi taybetî şîrketê EUTELSATî û dewleta Fransa û heme dewletê Ewropaye zî nê bêhuqûqîye ra çimê xo girewtî. Babete ser o edîtorê Med Nûçe TVyî Bakî Gulî qisey kerd.
Zaf ziwanan de weşan kerdêne
Edîtorê Med Nûçe TVyî Bakî Gulî derheqê televîzyonî de va ‘Med Nûçe TVyî sifteyîn bi kurmanckî û kirmanckî ra pîya bi ziwanê îngîlîzkî, ermenîkî, franskî û tirkî dest bi weşanî kerd’ û wina va: “Mîyanê demî de bi tirkî weşanê xo domna. Polîtîkayê xo yê weşanî de şarê ke hetê etnîsîte, dîn û kulturî de cîya yenî vînayîş, esas girewt. Tirkîya de averşîyayîşê sîyasî û komelkî ke hetê îqtîdar û dewlete ra çinî ameyêne hesibnayîş ardê ekranan ser.”
Dewlete her tim waştêne bêveng bikero
Gulî dewamê qiseykerdişê xo de va semedo ke Med Nûçe TVyî hetanê cîya cîyayan ardê ekranan ser û bîyêne vengê înan, bîye hedefê Tirkîya û wina va: “Çimkî rojname, TV û înternetê ke girêdayê AKPyî her çîyê ke qewimîyayênê, nimitênê. Yanî Med Nûçe TVyî feqîrîya ke Tirkîya de esta, rojnamegerê ke tewqîfkerde yî, cinîyan û bawerîyê ke teda vînenî, ardêne ziwan û bîyêne vengê înan. Nê semedî ra AKPyî her tim waştêne Med Nûçe Tvyî bêveng bikero.”
Tirkîya Ewropaye ser o şantaj kerdêne
Gulî bale ant ser hewldayîşê Tirkîya yê padayîşê televîzyonî û wina va: “Seba ke Med Nûçe TVyî Tirkîya de nêbî, taybet hedefê AKPyî de bî. AKP seba padayîşê ci her tim ser RTUKî ra welatanê Yewîya Ewropa Norveç, Belçîka, Fransa û Swedî rê nuşte erşawitêne. Reyna Tirkîya ser krîzê bextwaştoxan, menfîetê ekonomîkî û heta DAIŞî ser o şantaj kerdêne. Xora belgeyê ke vejîyayî orte zî nînan nîşan dayêne.”
Bakî Gulî peynîya qiseykerdişê xo de va doza Med Nûçe TVyî do 26ê teşrîna verên de bêro dîyayîş û wina va: “Doza televîzyonî seba EUTELSAT û Fransa sey îmtihanek o. Eke mehkeme lehê EUTELSATî qerar bido, do bibo ortaxê qirkerdişê kurdan ke dewamê qirkerdişê 1915î ye ermenîyan o. Yanî yeno eynî mana.”
Gulî qiseykerdişê xo de aşkere kerd ke EUTELSATÎ ti sedemê huqûqî nîşan nêda û Newroz TV û Med Nûçe TVyî pada û va: “Yeno famkerdiş ke EUTELSATî rişweto ke Tirkîya dayo qebûl kerdo û bi no hewa bîyo ortaxê faşîzmê Erdoganî. Reyna bîyo ortaxê hêrişê ke Kurdistan, Kerkûk, Şengal, Parîs û Brukselî.”
NAVENDÊ XEBERAN