Hefto peyen serokê mehkemê bingehin, Haşîm Kiliç, bendê weçînîtîsî ser fikrê xo vat, AKP dîna ey sero kerde tarî. Verecoy siyasetvananê AKP est Haşîm Kiliç ser, jê darbevan û siyaset rê mudaxalavan sucdar kerd. Evrenîst-faşîstî nêsermayenê. Zonenê ke no bendê weçînîtîs ke nêbo, serdestiya AKP nêmanena. Tabî dizdiya xo kî vejîna meydan. Heto Evrenîst-faşîst yê AKP bi pawitena bendê weçînîtîsî endî seweta herkesî zelal o.
AKP hem bi destê siyasetvananê xo hem kî bi destê mîlîtananê xo yê çapemeniye verva Haşîm Kiliç herb kerdo ra. Bi taybetiye mîlîtanê AKP yê ke çapemeniye de jê "rojnamevan” osenê, çekê xo guretê verva demokrasî qanunanê Kenan Evrenî pawenê. Nî mîlîtanê AKP teyna bendê weçînîtîsî nê, pêro qanunêke faşîst dîktator Kenan Evern vetê, înan rê wayîr vejînê. Nî qelemşorê AKPîstî rind zonenê ke, AKP ke biwastenê zerrê nî 12 serran de destura bingehin yê Kenan Evrenî vurnenê. La nî qelemşorî dizdî û serdestiya AKP ra bara xo cenê. AKP mosilê dizdiya xo ra hebe lop erzena nînan ver û çeverê xo de dana vindarnayene.
Jû ke AKP ra çiye vano, AKPyizî ey bi darbevaniye sucdar kenê. Par 17ê asma qanune de sayiya wertaxê nînan de dizdiya AKP vejiye werte. AKP vat, verva aye darbe yena virastene. Terso henen kewto zerrê sermiyananê AKP ke, jû ke vazo ‘nika mîja mi yena, ez gune tever vejîne’ AKPyîzî vanê ‘aha no zî darbe keno amade.”
Ma de jû hekate esta. Jû dewe de cenîkê estbiya. Na cenike kamij cîrana xo de dana pêro, ci ra vana ‘aspizine!’ Pêro cirananê xo ra niya milqî kena. Rozê ceniyê dewe yenê pêser, qerar cenê û verva cenîke kunê hereket. Cenîke meydanê dewe de danê waro, kinc û kolê cenîke vezenê. Niyadanê ke her caye cenîke pirrê aspizan o.
Halê AKP kî tam niya ro. Herkesî bi darbevaniye sucdar kena. La raştiye de en darbevana girse AKP ya. Çike en jede AKP qanunanê faşîst dîktator Kenan Evern rê wayîr vejîna. Nî rozan de mesela bendê weçînîtîsî na hal hebena zelal ana verê çiman.