Heta ewro 41 rojnamegerî giroteybî. Tenê welat de sebeno kerdê xeberî. Bi raya çapemenî şar agahdar kerdêy. Xo rojnamegerî zî eno çîyo. Semedêko nê 41 kesan ra henî zêde xebatkarê Rojnameyê Ozgur Gundemî yê. Rojnamegerê demokrasî û azadî xo rê kerda şîyar hetkarî na rojnameydire kenê. Ku nê enê rojnamegerîy bê; Şirnex, Silopî, Cizîr, Sûr, Gewer û cay bînan de çi qewemyeno ka kamga pêbihesyo. Hurşît Kulter senin zanebime hêzanê dewlet yo berdo. Hema zî aqûbetê cê persen.  Şebnem, Erol û Ahmed zî bi nê minasebetî rocêk bîy verpersê na rojnameyî.
Dozger; derheqê Şebnem Korur Fîncanci, Erol Onderoglu û Ahmet Nesînî de giroteyeyî waşt. Dadgerî zî zey waştekê cê tewqîf kerdî her hîrê zî! bîy 44 kesî.
Prof. Fîncanci, Serokê Weqfa Merdimahîye ya Tirkîya. Erol Onderoglû, rojnamegero û temsîlcîyê Tirkîya yê Rêxistinê Rojnamegerî yê ku Tuxub Nasnêkenê yo (RSF). Ahmet Nesîn, nûştox o.
Sûcê yine çiwo?  Propogandayê rêxistina terorîkerdiş o…
Tenê rocêk her yew hetkarî bi rojnameyê Ozgur Gundeme  kerdo. Biyê verpers rocêk. Na hetkarî zey propogandayê terorî amewa hesebnayiş. Tenê nê  sebebanra nê. Nizdî 3 henzarî merdiman sedemê ku heqaret ro verpersê Seraye kerdo ceza girewta. 2 henzarî vêşêrî roşnvîr û akedemîsyan tenê wa no welat de gonî nêro rişnayiş vat. Çi arde yine serî.
Eqil qebûl nêkeno! Wijdan qebûl nêkeno! Ka heq huqûq çicayê nayed?
Hend neyartîya azadîye beno? Rojnamegerî sûc niya, peynî de do yê vînîkerê zî yê neyarê azadîye bê!
Tirkîya de darazî yê Saraya, dadgerî yê Sarayî, dozgerî yê Sarayî. Azadî her rocê Homay binê lînganê îktîdarîya Sarayî de yena pelexnayiş. Lazim o merdim nê zulmî û heqsizîyanrê bêveng nêmano. Bêvengî, teslîmîyet o. Qebûlkerdiş o. Lazim o merdim nê qebûlkero nê zî teslîm bibo. Tim vaco; biqîro, sewt veco. Rojnamegerî sûc niya. Xebervatiş sûc niya.
Şinawitişê xeberêkê no welat de yenê vînayiş şarî dir barekerdiş mafê azadîyê xeberan a. Parastiniya azadiya îfadan sûc niyo. Hetkarîya rojnameyê Ozgur Gundem qet sûc niya.  Nê sebeban ra bêveng nêmanim û nêmanenim zî. Tenê rojnamegerîy girewtey nîyê. Kam no welat de muxalefetî bikero cayê cê hepisxaneyê. Tenê erdnîgariya Kurdistanî de nê. Heme hetê nê welatî de ewnayo. Se serro pirsgirêka demokrasî û pawa giredaye pirsgirêka kurdan çareser mekerê. Kam nê pergalî (sîstem) rexne bikero yine peştî dane teror bihesebne! Ewna amo raşta la wa dinya alem bizano ewna nêşino.
Teda… Dadgehey… Hapisxaney…Nê zef ray amey cerebnayiş la peynîde yinêko nê cerebnay yine vinî kerd. Azadî qezenc kerd. Sultanêko Saraye do bi adir kaye keno!
Peynî de zey heme despotan go vinî bikero. Tekoşîna demokrasîy û azadî go dewam bikero.