Hunermende Hozan Mizgîne (Gurbet Aydine) 11ê Gulana 1992î de qezaya Tetwanî ya Bidlîsî de netîceyê pêrodayîşê bi hêzê dewlete reyde şehîd kewtbî û ewro serrgêra 26. ya şehadetê Hozan Mizgîne yo. Wexto ke Hozan Mizgîne şehîd kewena, bi hezaran kesî herikîyenî cayê şehadetê aye û bi saetan ziqaqanê Tetwanî de siloganê ‘Şehîd nêmirenî’ berz benî. Babete ser o Mecbure Aslana ke şahidîya xebatanê Hozan Mizgîne kerdbî, qisey kerde. Mecbure Aslane dîyar kerde ke wexto ke Mizgîne ameye Tetwan, têkoşînê cinîye tîya de dest pêkerd û wina va: “Mizgîne cinîyêka zaf cîyaye bîye. Dinya de cinîyê sey aye kêmî yî. Zaf jêhatî bîye û qet nêbetilîyayêne. Ez zî zaf aye ra tesîr bîya. Ya ma cinîyanê tetwanijan rê zaf çîyî verdayî. Hem hunermend bîye, hem zî şerwan. Wexto ke moralê embazan xirab bibîyêne, bi vengê xo yê weşî deyîrî vatêne.” Aslane dewamê qiseykerdişê xo de qala şehadetê Hozan Mizgîne kerde û wina va: “Wexto ke şehîd kewte, herkes şî cayê şehadetê aye. Ma seba ke cenazeyê aye nêkewo destê dişmenî, ewil ma tabutêko veng erşawit, dima ra ma bi tabutêko bîn reyde aye defin kerd. Eke ewro her keye de nameyê Mizgîne esto, seba ke ma deyndarê aye yî yo.” JINNEWS / BIDLÎS