’ŞARISTAN MAHÎR ANF/BEHDÎNAN 6ê Gulana 1972î de Şorişgêrê namdarî Denîz Gezmîş, Huseyîn Înan û Yusuf Aslan ameybî îdamkerdiş û emser serrgêra 46. ya îdambîyayîşê înan o. Babete ser o Endamê Konseyê Caardişî yê KCKyî Mustafa Karasuyî qisey kerd û 3 şorişgêrî vîr ardî. Karasuyî dîyar kerd ke nika ra 46 serrî verê rayberê şorişgêrî Denîz Gezmîş, Huseyîn Înan û Yusuf Aslan ameyî îdamkerdiş, ez înan biminet vîr ana’ û wina dewam kerd: “Îdambîyayîşê înan tarîxê Tirkîya de donemêko newe dayo destpêkerdiş. Çimkî nê şorişgêran hetê tarîxê Tirkîya û tevgerê ciwanan ra donemêko newe dayî destpêkerdiş. Heme 3 şorişgêran zî ser ciwan û komelî de tesîrêko gird viraştbî.” Karasuyî dewamê qiseykerdişê xo de wina va: “Têkoşînê Azadîya Kurdî zî dewamê ananeyê Denîz, Mahîr û Îbrahîman o. 3 şorişgêran Zîndanê Mamakî ra berdî, îdam kerdî û o wext Rayber Apo zî o zîndan de bi. Rayber Apo îdambîyayîşê înan xo vîra nêkerdo, soz dayo înan. Xora wexto ke zîndan ra vejîya, sozê xo tepişt û têkoşînê ciwanan aver berd. Vindetişê înan PKK ser o tesîr kerdo û ewro zî tesîr keno. Ma ewro hewl danî ruhê Denîz, Îbrahîm û Mahîran bidî cuyayîş. Îdambîyayîşê înan mi ser o zî tesîrêko gird viraşt. Înan wextê îdamî de vatbî ‘Wa bicuyo biratîya tirk û kurdan’. Ewro zî lazimî bi nêyî esta. Çimkê seba Tirkîyaya demokratîke û Kurdistano azade çîyo tewr bingeyîn no yo. Ma înan bi rêz û minet vîr anî û ma yewna rey sozê awankerdişê Tirkîyaya demokratîke û Kurdistano azade danî.”