Xeylê bajaranê Ewropa de kurdî û dostê ci vera qerarê Amerîka yê vera rayberanê kurdan, qedexeyê Fransa yê çalakîya kurdan û tecrîdê Îmralî de vejîyayê meydanan.
Bajarê Marsîlya yê Fransa de bi çalakîyêk qerarê Amerîka yê vera îdarekaranê PKK û KCKyî ra Duran Kalkan, Cemîl Bayik û Murat Karayilanî ame protestokerdene. Grûbêk verê konsolosxaneyê Amerîka de ameye têhet û bi silogananê ‘Ma heme PKKyij î’, ‘Erdogano qetilkar, Trumpo hemkar’ û ‘Bicuyo Rayber Apo’ piştî da PKKyî û qerarê Amerîka şermezar kerd.
Paytextê Avusturya Vîyana de zî kurdîstanijî û dostê ci vejîyayî kuçeyan tecrîd û hêrişê dewleta tirkî yê serê Rojawanî protesto kerdî. Çalakîkeran çadirê rona bi vilawekan derheqê felsefe û rewşa Ocalanî de zanayîş da. Çalakî do ewro zî bêro dewamkerdene.
Bajaranê St Gallen û Baselî yê Swîsre de zî qerarê Amerîka yê vera îdarekaranê PKK û KCKyî, qedexekerdişê çalakîya Strasbourgî yê Fransa û tecrîdê serê Ocalanî ameyî protestokerdene. Basel de bi vengdayîşê Tevgerê Ciwananê Şorişgêrî ciwanê kurdan vejîyayî meydanan. Çalakîkeran dîyar kerd ke ê qedexeyê Fransa nêşinasnenî û her cayî açarnenî cayê çalakîyan. St Gallen de zî kurdî û dostê ci meydanan de bî. Qiseykerdişan de ame vatene ke bi qedexe û qeraranê lêşinan kes nêeşkeno kurdan cêserbifîno. Kurdî wayîrê rayber û tevgerê xo vejîyenî.
ANF / BRUKSEL