ERGÎN ÇAGLAR / DÎHABER - MÊRSÎN
Akademîsyene Nurîye Gulmene û mamosta Semîh Ozakçayê ke çarçewaya Qerarnameyê Hukmê Qanûnî (KHK) de ameybî îxraçkerdiş, seba ke tepîya biagêrî karê xo, dest bi grevê vêşanî kerdbîy. Grevê vêşanî yê Gulmene û Ozakçayî roja xo ya 140. de dewam keno. Qasê ke avûkat û merdimanê înan ra xebere yena girewtiş, her di çalakgerî zî qerardar î ke heta peynî grevê xo bidomnî. Labelê rewşa her dîyan zî her ke şono hîna xirabêr bena.
Babete ser o Gulbeyaz Karaera ke Zîndanê Sîncanî ra tehlîye bîye, qisey kerde. Karaere qiseykerdişê xo de qala waştiş û qerardarîya Gulmene kerde.
Seba Gulmene munasîb nîyoKaraere va ‘koguşo ke ma tede mendêne, koguşê kesê ke cezaya muebedî girewtî bî’ û wina dewam kerde: “Ma 3 kesî tede mendênê, labelê koguşê ma yewbînan ra cîya bîy. Badê ke Nurîye ameye, berê hucreyan ameyî akerdiş. Ma zî saya nêyî de hetê Nurîye de mendêne. Çimkî lazimîya aye bi xizmetî estbîye. Badê OHALî zaf hûmare de kesî tewqîf bîyî û ameyî zîndan. Zîndan seba Nûrîye munasîb nîyo. Zîndanan de cayê destawe herinda mitbaxe de yênî xebetnayîş. Ma nê hucreyan de mendênê.”
Tena karê xo waştêne
Karaere dewamê qiseykerdişê xo de wina va: “Wexto ke Nurîye ameye, sifteyîn rewşa aye zaf xirab nêbîye. Şînayêne vejîyo cayê hilmgirewtişî û qisey bikero. Seba pêvînayîşê avûkatî bi wesayîtê tekelin reyde şîyêne-ameyêne. Tim siloganê aye ‘ma karê xo wazenî’ bî. Doktorî waştêne ke Nurîye tedawî bibo, labelê Nurîye qebûl nêkerdêne. Badê ke 15 hepsîyî sewqê Zîndanê Tarsusî bîyî, cayê ma ame bedilnayîş. Cayê newe de rewşa Nurîye zaf baş nêbîye. Mi nêverdayêne Nurîye kar bikero, labelê mi ra vatêne; Wayê, verade ez karê xo bi xo bikera, beno ke to zî hetê mi ra bigîrî. Ez tena zî bimana, ez do xoverdayîşê xo bidomna. Serkewtiş yê ma yo.”
Ez do nêverda
Karaere qala munaqeşeyanê xo û Gulmene kerde û wina va: “Nurîye tim mi ra vatêne; Wayê heta ke karê mi tepîya bidîyo mi, ez do çalakîya xo bidomna, se beno wa bibo. Parlamenterê ke ameyênê pêvînayîşî û mektûbê ke ameyênê tim qala qedênayîşê grevî kerdênê, Nurîye vera înan de reaksîyon nawitêne. Nurîye vera înan de vatêne ‘Nê vatişî hêz nêdanî mi, hêz danî dişmenê mi. Herinda ke mi ra vanê biqedêne, wa dewlete ser de zextan bikerî. Ez seba çîyêko heqdar kewta grev, ez bimira zî vera nêdana.”
Birayê mi ame mi vîr
Karaere qiseykerdişê xo wina domnaye: “Birayê mi seba ke Zîndanê Tîpê Fyî bêrî padayîş, kewtbî grev. Ez o wext hetê birayê xo de bîya. Birayê mi Ugur o wext Mêrsîn de verika mi de merd. Mi bi Nurîye reyde reyna birayê xo hîs kerd. Wexto ke xebera mi ya tehlîyebîyayîşî ameye, ez qet kêfweş nêbîya, hetta ez xemgîn bîya. Nurîye mi ra va ‘zerrîya mi zî xo reyde bîşo, teber’. Mi zî aye ra va ‘ez do zerrîya to bîşêra teber, labelê do zerrîya mi zerre de bimana’. Wa selahîyetdarî bieşnawî, wa Nurîye û Semîh nêmirî. Ê tena wazenî biagêrî karê xo. Ez nêwazena Nurîye vînî bikera.”