SILAVA EBDILREHMAN / ANHA/QAMIŞLO
Wexto ke DAIŞî 3ê Tebaxa 2014î de hêrişê Şengalî kerd, bi hezaran cinî, doman û sewbîna kesî remnaybî. Nê kesan ra yewe zî Şêrîn Dexîla 25 serreyî ke 3 domanê aye estî, ya.
Babete ser o Şêrîn Dexîle qisey kerde û qala çîyê ke cuyaybî kerde. Dexîle va ‘çeteyan ma 30 cinîyan keyeyêkî de kom kerdî û dima ra 20 çeteyê DAIŞî ameyî ke xo rê cinîye biweçênî’ û wina dewam kerde: “Wexto ke ma waşt ke domanî zî hetê ma de bimanî çeteyan îşkenceyê ma kerdî. Dima ra seba ke domanî beşdarê înan bibî, perwerde dayî domanan. Perwerde dayênê domananê lacekinan, labelê yê kênekî zî hetê cinîyan de mendêne.”
Seke ma newe ra bêrî dinya
Dexîle demêkî hetê çeteyê tirkî yê bi nameyê Ebdilhemîdî de manena û dima ra çeteyêko bîn rê yena rotiş. Dexîle wina domnaye: “Wexto ke mi waştişê nê çeteyî nêardêne ca, îşkenceyê domananê mi kerdênê. Dima ra eyî zî mi rote endamêko bîn yê DAIŞî û eyî zî her roje îşkenceyê mi kerdêne. Tewr peynî înan ez berda Dêra zorê. Ma bawer nêkerdêne ke ma destê DAIŞî ra xelas bibî. Wexto ke ma resayî warê HSDyî, ma kêfî ver firayênê. Seke ma newe ra bêrî dinya. Ez do çîyê ke cuyaya ver bêveng nêmana û heyfê xo û domananê xo bigîra. Ez do beşdarê Yewîya Cinîyanê Şengalî biba û pawitişê xo û cinîyanê êzidî bikera.”
Yewîya Pawitişê Şengalî Şêrîn Dexîle û 3 domananê aye teslîmê Koma Cinîyan ya Kantonê Cizîrî kerdî û dima ra do teslîmê keyeyê aye bêrî kerdiş.