Gerîlaya cinîye ya bi nameyê Azê Vîyane, wexto ke beşdarê gerîla bena, ziqaqan de deyîran vana. Gerîla Azê fek muzîkî ra veranêdana û wina vana: “Ez do rayîrê Delîla, Hozan Serhat û Hozan Mizgîne de şêra.” ARJÎN MÎDYAT / ESTE AŞMÎ ANF / BEHDÎNAN Gerîlaya bi nameyê Azê Vîyane ke Kars de yena dinya, zext û zordarîya dewlete ver mecbûr manena ke şêra Ewropa. Labelê Azê nêşêna ewja de bicuya û 2017 de vera xo dana koyan û beşdarê gerîla bena. Beşdarbîyayîşê gerîla ra ver lazimîya Azê bi sewlêk bena. Azê bi ziqaqan de deyîr vatişî lazimîya xo pê ana û amadekarîya xo ya beşdarbîyayîşê gerîla temam kena. Azê Vîyane vana ‘muzîk seba mi çîyêko zaf cîya yo’ û wina domnena: “Ez domanîya xo ra heta ewro deyîran vana. Seba ke ez koyan de pay bikera lazimîya mi bi sewlêk estbî. Ez û embazanê xo ma şîyî Avcilarê Stenbolî û ma ewja de hunermendîya ziqaqan kerd. Mi bi kurmancî deyîrî vatêne û ez zaf zerrîweş bîyêne. Dima ra mi xo rê sewlêk herîna û ez ameya koyan.” Azê Vîyane qala şîyayîşê xo yê Ewropa zî kena û wina vana: “Ma zextan ver mecbûr mendî ke şêrî Ewropa. Ez demêko kilm welatê Tîje ra durî kewta. Labelê mi reyna vera xo koyanê Kurdîstanî. Cêwîyê mi beşdarê gerîla bi. Dima ra ma qisey kerd û ez zî beşdarê gerîla bîya. Mi mektuba Vîyan Sorane ke seba Rayber Apoyî bedenê xo daye adirî ver wende û mi qerarê xo zelal kerd. Wexto ke ez beşdar bîya, ez zaf heyecanin bîya. Mi qisey nêkerdêne, embazan persî pers kerdênê, mi zî cewab dayêne persanê înan.” Wa nameyê to Azê bo Azê Vîyane va ‘wextê beşdarbîyayîşî de embazêka bi nameyê Saraye ameye mi vera’ û wina domnaye: “Embaze mi ra va ‘Ti zaf Embaze Azê manena, xora şima her di zî Serhed ra yî; coka wa nameyê to Azê bo’. Mi zaf waştêne birayê xo Navdar bivîna. Labelê dima ra mi eşnawit ke birayê mi şehîd kewto. O wext mi zaf zeyîfîye hîs nêkerd. Mi fam kerd ke ganî ez bi hawayo hêzêr beşdar biba û wayîrê mîrasê birayê xo vejîya. Embazan sîlehê birayê mi ardî mi rê. Labelê mi hertim xo ra pers kerdêne; gelo ez do biba layîqê ê sîlehî? Mi ewil sîleh verik kerd. Ez her ke sîlehî ra ewnîyena, seke ez birayê xo Navdar bivîna, hîs kena.” Mi fek muzîkî ra veranêda Azê Vîyane peynîya qiseykerdişê xo de wina vana: “Ez bi muzîkî bêrîyê birayê xo ana ziwan. Muzîk parçeyê cuya min o. Radyoya Erîvanî mi ser o zaf tesîr kerdêne. Rojêk mi dayîka xo ra persê ‘ez senî eşkena nê muzîkan peyda bikera?’ kerd. Ya zî mi ra va ‘şo dewe de yayka Pînoşe to rê heme deyîran vana’. Ez şîya dewe û yayka Pînoşe mi rê qala muzîkan kerde. Mi qet fek muzîkî ra veranêda. Ez do rayîrê Delîla, Hozan Serhat û Hozan Mizgîne de şêra. Rayberîye seba PKKyî vano ‘PKK roman, şîîr û deyîrêk o û rind o…’ Cuya gerîla, PKK deyîrêk o, romanêk yan zî huyayîşêk o. Ge-ge serewedaritiş o, dejin o labelê weş o.”