Bi nizdîbîyayîşê referandûmî cepheyê ‘nê’yî her ke şono gird beno. Her roje hetê cîya-cîyayî dewe, qeza û bajarê cîya-cîyayî derheqê referandûmî de fikrê xo aşkere kenî û îzeh kenî ke seba çi do vajî nê. Nînan ra yewe zî Bajarê Dîlokî de qezaya Şahînbeyî ra Şukru Gumuştekîno 75 serreyî yo. Gumuştekînî babete ser o qisey kerd û fikrê xo ard ziwan.Gumuştekînî dîyar kerd ke Dîlok bajarê Hakî Kareran o û qiseykerdişê xo wina domna: “Seba vatişê ‘nê’yî xeylê sebebê mi estîy; Rayber Apo 18 serrî yo ke binê tecrîdî de yo, parlamenterê ke bi îradeyê ma ameyî weçînayîş tewqîfkerde yî û şaredarîyê ma ameyî xespkerdiş. Ez do seba çi vaja ‘ya’?”
Cayê hakî kareran o
Gumuştekînî dewamê qiseykerdişê xo de va ‘xeylê muxabîrê çapemenîye yenî herême, labelê xeberan goreyê xo pêşkêş kenî’ û qiseykerdişê xo rê wina dewam kerd: “Ez kurd û kurdistanij a û ez bi nêyî îftixar kena. Dîlok bajarê Hakî Kareran o. Cok ra cayê zaliman nê bajarî de çin o. Têkoşînê Azadî yê Kurdistanî ra dima nê erdan rê mana û erjêko gird yeno dayîş. Dîlok de zaliman rê rey nêvejîyeno. Heme dinya vajo ‘ya’ zî ez do vaja nê. Bi serran o deleta tirk û AKP şarê kurd qir kenî. Sûr, Cizîr, Nisêbîn û Şirnex de bi hawayo hovane hêrişê şarê ma kerdî. Seba vatişê nê sebebê mi zaf î. Ez do heta dalpeya gonîya xo vaja nê û ez do seba nê bixebetîya.”
Seba Rayber Apoyî nê
Gumuştekînî peynîya qiseykerdişê xo de bale ant netîceyê referandûmî ser û qiseykerdişê xo wina qedêna: “Eke netîceyê referandûmî de ‘ya’ bivejîyo, do rojê tarî paweyê kurd û tirkan de bibîy. Ganî şarê Dîlokî wayîrê tarîxê xo bivejîyo û referandûm de vajo nê. Ganî seba azadîya Kurdistan û Rayber Apoyî vajo nê. Ma do seba ke bişînbî zulm bivindarnî û rojanê azadan bivînî, ma do vajî nê. Her reyêk wayîrê qîmetêk o û bêrê ma pîya vengê ‘nê’ zêde bikerî.”
OMER ÎKE / ANF-DÎLOK