Çalakîya grevê vêşanî ya Nurîye Gulmene û Semîh Ozakçayê ke seba biagêrî karê xo daybî destpêkerdiş, roja 205. de dewam kena. Seke yeno zanayîş her di çalakgerî roja 76. ya grevê vêşanî ra nata tewqîfkerde yî. Tewr peynî 3 rojî verê Nurîye Gulmene bi hawayo zorî odeyê xo yê Nêweşxaneyê Zîndanî ra ameybî vetiş û neqlê Nêweşxaneyê Numune yê Anqara bîybî.
Vizêr saetanê serê sibayî de roniştişo 2. yê doza Nurîye û Semîhî dest pêkerd. Selahîyetdaran seba ke Nurîye bi hawayo zorî berdbî nêweşxane, nêardî mehkeme û tena Semîh ardî. Cinîya Semîh Ozakçayî Esra Ozakçaya ke 130 rojî yo ke grevê vêşanî de ya zî beşdarê mehkeme bîye. Heto bîn ra xeylê kesî seba ke beşdarê mehkeme bibî ameyî vernîya Zîndanê Sîncanî.
Mehkeme bi 30 kesan sînordar kerdî
Dormeyê zîndanî de hetê polîs û cendirmeyan ra tedbîrê ewleyî yê hîrayî ameyî girewtiş. Kewtişê zîndanî de 3 nuqtayê sehnayîşî ronîyayî û kesê ke beşdarê doze bîyî, badê ke nê nuqtayê sehnayîşî ra derbaz bîyî, kewtî mehkeme. Heto bîn ra kesê ke beşdarê mehkeme bîyî, qeydê înan yê nasnameyî ame girewtiş û dima ra ame vatiş ke do tena 30 kesî bişînbî beşdar bibî. Reyna hûmara avûkatan zî bisînor kerdî.
Parlamenterê HDPyî Aycan Îrmeze, Saadet Becerîklî, Mîthat Sancar, Parlamentera Xosere Aylîn Nazliaka, Parlamentera CHPyî Sezgîn Tanrikulu û Alî Haydar Hakverdî, Sekreterê Pêroyî yê THÎVî Metîn Bakkalci, Hemsereka KESKî Aysun Gezene û Sereka Pêroyî ya Egîtîm Senî Feray Aytekîne beşdar bîyî. Heto bîn ra seba ke doze taqîp bikerî, heyetê xerîbî zî beşdarê doze bîyî. Nînan mîyan de Ajansê Heqê Merdiman yê Milletê Yewbîyayeyî, Beşa Heqê Sîyasî ya Konsolosîya Kanada, Konfederasyonê Karkerê Rayapêroyî yê Yewnanistanî û Sendîkaya Wendekarê Lîse ya Yewnanistanî zî estbî. Rojnamegeran ra zî yê ke kartê înan yê zerd estbî, girewtî mehkeme.
Şima temaşe kenî
Ozakçayî pawitişê xo de va ‘Nurîye Gulmene bi zorî remnayî û berdî Nêweşxaneyê Numune’û wina dewam kerd: “No vera heqê pawitişî de hêriş o. Mi bi çimê xo dî ke polîsî kewtî odeyê dozgerî û çay şimitî. Nanê mi destê mi ra girewtî û waştî mi terbîye bikerî. Mi waşt nanê xo destê dizdan ra bigîra. Wa ti kes hêvî nêkero; ez vera neheqî û bêhuqûqîyan de sere nêronena. Tarîx nika neheqî û bêhuqûqîyêkî nuseno. Şima bi hawayo aşkere cînayet temaşe kenî. Mi bi şerefê xo nanê xo qezenç kerdêne. Tarîx têkoşînê azadî, edalet û nanî ra pê yeno.”
Heto bîn ra polîsan mudaxaleyê kesê ke vernîya zîndanî de bîyî kerdî û bi nameyê Denîz Aydinî de kesêkî tepiştî.
JINNEWS/MA-ANQARA