SÎNAN DENÎZ / ANF / BAB
Hêrişê provakatîfî yê dewleta tirk vera dewanê Bab û Minbicî de dewam kenî. Hêrişê tanq û topan ver keyeyê sîvîlan rijîyenî, heywanê înan telef benî. Nê dewan ra yewe zî dewa Boxazî ke kontrolê Şerwananê Meclîsê Leşkerî yê Babî de ya.
Keso bi nameyê Hesen Hecî Musa El Alî yê 60 serreyî, qerardar o ke keyeyê xo nêterikno. Şerwanî zî vera qerarê Elîyî de rêz nîşan danî. Babete ser o El Alîyî qisey kerd.
El Alîyî va ‘ez do heta peynîya emrê xo dewa xo de bimana’ û wina domna: “Ez serra 1941 de ameya na dewe û ez fikiryena ke heta mergê xo tîya de bimana. Ti hêz nêeşkeno mi erdê mi ra bivejo.”
Bawerîya mi bi şerwanan esta
El Alîyî bale ant xoverdayîşê şerwanan ser û wina va: “Nika netîceyê hêrişanê dewleta tirk û çeteyê girêdayeyê înan de keyeyê ma rijîyayî û zafaneyê dewijî ca û warê xo teriknayî. Ez nêşîya û do nêşêra zî. Bi cinî û domananê xo tîya de manena. Nê cayî nizdîyê 3 serran destê DAIŞî de mendî û qet nêbaş bî. Dima ra şerwanî ameyî û ma rizgar kerdî. Ma roja rizgarbîyayîşî sey roşanî pîroz kerd. Ewro dewleta tirk wazena ma bikera koleyê xo, labelê do nêreso hedefê xo. Çimkî bawerîya ma bi şerwanan esta.”