Na proje rê 1 milyon û 619 hezar û 104 lîre mesref şino. Şaredarîya Bajarê Girdî çarçeweya proje de Taxê Qezaya Licê Hendîf û Spênî de 13 hezar û 480 metre, Taxa Hêni Yukari Turali de 3 hezar û 85 metre, Taxa Pasurî Arkatîn de 3 hezar û 150 metre, Taxa Farqînî Çîçikan de zî 4 hezar û 250 metre dest bi viraştişê kanalê awdayîşî kerd. Xebatî qezayê Hêni û Pasur de qedîyê, Farqîn û Taxa Licê Spênî de se ra 90 qedîyê. Taxa Licê Hendîf de zî serê na aşme do xebatî dest pêbikerê û hetanî Teşrîna Peyêne biqedîyê.

Bi nê kanalanê awe, Taxa Licê Hendîf de hezar 50 dekar, Taxa Spênî de 600 dekar, Taxa Pasurî Artakîn de 534 dekar, Taxa Farqînî Çîçikan de 340 dekar û Taxa Hêni Yukari Turali de zî 300 dekar erd do bêro  awdayîş. Bi no qayde pêroyî de 2 hezar û 824 dekar erazîyê zîretî yenê awadayîş û ci ra qasê 730 keyeyî feyde vînenê.

 ‘Ma kenê ke wa şarê ma peyser bêro erdê xo ser’

Mudira Şaxa Averberdiş û Zixmkerdişê Karê Heywankarî û Zîretî ya Serekîya Dayîreyê Xurtkerdişê Ekonomîya Herêmî Gulbahar Bozarslan Tunç derheqê xebatan de zanayîş da û wina va “Sîstemo ke ma virazenê pê ey pêroyî de awe dîyena 2 hezar û 824 donum erazî. Eke sîstemê awdayîşî bikewo falîyet ma bawer kenê ke şarê ma do peyser ageyro dewan. Eke xebata ma ya kanalê awdayîşî qedîya ma do semedê ramitişê hêgayan dewijan de pîya xebate bikerê. Heto bîn ra ma Taxa Pasurî Artakîn de 74 heb vanayî kerdî pa. Semedo ke ma vanayan bipawe zî ma 74 heb rogarî viraştî. No sîstem reya ewilîyo ke yeno ceribnayîş. 

Şenê yew kooperatîf ronê

Tunçe dewamê qiseykeridşê xo de îzah kerd ke, wexto ke xebate qedîya ê do semedê ronayîşê koperatîfan zî dest bi xebate bikerê û wina va “Eke pêro dewe bibê yew eşkenê mîyanê xo de semedê rotişê çî-çîyanê xo yew kooperatîf ronê. Ma zanê ke sezbze û fêkîyê ke Amed de yenê rotiş zafê xo teber ra yenê. Eke m ana xebate temam kerd do citkarê ma sebze û fêkîyanê xo bîyarê mîyanê bajarî de roşê.” 

‘Citkaran rê  toxim keme vila’

Tunçe da zanayîş ke zebze û fêkîyê ke teberê bajarî ra yenê mîyanê înan zaf gubre û derman esto û wina va “Ma bawer kenê ke eke erazîyê ma bibê awin hinî şarê ma do zebze û fêkîyanê organîkan biwero. Semedê ramitişê hêgayan zî do toximê herêmî bêrê xebitnayîş. Ma do nê toximan citkaran rê vila bikerê.” 


 AMED