Kurdên Êzîdî bi navê “1.Festîvala Çarşema Serê Nîsanê” yekem car festîvalekê lidar dixin. Ev festival ji bo civaka Êzîdî xwedî cîhekî gelekî taybet e. Ji ber ku Çarşema Serê Nîsanê, ku weke Çarşema Sor jî tê naskirin, herweha yek ji cejnên herî girîng ên Êzdiyan e. Ev Cejn li gorî teqwîma îro roja çarşema piştî 13'ê Nîsanê tê pîrozkirin. Lê festîval wê 20'ê Nîsanê li bajarê Almanya Hannoverê pêk were û ji aliyê Federasyona Komeleyên Êzdiyan (FKÊ) ve tê organîzekirin.


Bernameya xurt a çandî
Komîteya amadekar a festîvalê bernameyeke xurt amade kiriye. Di çarçoveya bernameya festîvalê de Hunermendên weke Hesen Şerîf, Tahsîn Xidir, Sîlbûs û Tarî, Dilgêş, Dilovan Silêman Rengîn, Marget-Rêzan-Zozan wê bi stranên xwe derkevin pêşberî beşdaran. Wekî din qewl û beytên Êzdiyan wê werin gotin.
Banga beşdariyê
Êzdiyên li Almanyayê dijîn ketine nava heyecana festîvalê. Li her deverê xebatên xurt tên meşandin. Komîteya amadekar a festîvalê roja Yekşemê civîna xwe pêk anî û amadekariyên xwe di ber çavan re derbas kir. Komîteyê biryar da, ku hemû partî, sazî û dezgehên Kurdan dawetî festîvalê bike.
Komîteya amadekar di civîna xwe de girîngiya beşdariyeke xurt vegot û xwest her Êzîdî û dostên xwe tevlî festîvalê bibin.
Tê payîn ku bi hezaran Êzîdî û dostên xwe ji her devera Almanyayê tevlî festîvalê bibin.
Ji bo kesên dixwazin beşdarî festîvalê bibin navnîşana festîvalê ev e:
Hannover Congress Centrum
Theodor-Heuss-Platz 1-3
30175 Hannover

YENÎ OZGUR POLÎTÎKA/HANNOVER