Azad ARARAT Dirav* çîyêko winî yo ke, sey fahîşeya rindeke (!) xapênena. Kesê ke diravan ver merdimîyeya xo ra tawîzan medo, hema vaje çin o. Mesele xorîn a. Hêzê diravî yê Homayî ra zêdeyêr o. Çunke winî bîyo ke kes şeno dînê xo ra ravêro la nêşeno diravan peygoş bikero. Bitaybetî şaristanan de kam şeno bê dirav yan tay diravan reyde cuye ravêrno. Nê çîyanê winasîyan her kesê ke hişê xo bîyarê xo ser, şenê asanî bivînê. Her kesê ke keyeyê xo de têkilîyanê xo çiman ver ra ravêrnê, bi hawayo asan vînenê ke têkîliyê cinî û camêrdî, dayîke, babîye û yê domanan, yê domanan dayîke û babîyî reyde, eslê xo de têkîlîyê bi adil nîyê. Hetta heskerdiş, sînayîşê yewbînî bi diravî ra beste yo. Kesî nêwazenê hetê kultur, zanyarî ûêb de rewşe holêr bikero. Her kesî wazenê hetê diravan ra cuya xo raver bibero. Eke ameyox hetê diravan ra kewte bin garantîye kesî xo garantîye de vînenê. Cuye senîn a, ehlaq û terbîye senîn o, kaxuyê kesî nîyo. Prensîbê tewr zaf yeno esas girewtiş, dewlemendî, maddîyat o. Diravî komelan de prensîp nêverdayo. Qandê cû sîstemê globalî şeno emrê xo derg kero. Xora her ke derg keno hîna veşî merdimîye cewherê xo ra kewena durî. Eke ez nînan vana nêyeno o mana ke merdimê kominal û merdimhesî çin ê. Ma keyepelê xo yê dimilkinasi.info û dimilkinasi.info/ku bi hetkariya tay dostanê xo yê erjaye îdare kenê. Xora erjê kominal û yê komelî se ra se orte ra nêyenê wedarnayene. Erjî manenê la benê tay, benê zeîf. Reyayîşê merdimîye cuya kominale de ya. Eke erjê kominalî bîbê vêşî o wext diravî nêbenê yew fahîşe û merdiman rastîye ra nêvejenê teber. Her kes rayîrê rast ra şino û zilm û teda zî benî kêmî. Tarîxê merdimîye derg o. Şino heta bi mîlyonan serran. Nê mîlyonan serran de se ra neway û new merdimîye dirav nêdîyo û bikar nêardo. Cuya nê çaxanê kominalî de sey ewro xirabî raver nêşiyê. Wexto ke bazirganîye û bazirgan raver şi o wext mezg û cuya merdimîye de rijîyayîş dest pêkerdo. Coka cuya merdimîye de bazirganî û bazirgan bibê kemî o wext peynîya şer û xirabîyan zî yena. Bêgûman ewro ma nêşenê diravî cuya xo ra vejê. Çi heyf, bê diravî cuye nêbeno. Labelê ma şenê tesîrê diravî bikerê kemî. Ma şenê cuya kominale ronê û pêr û pîya bicuyê. Ma şenê koperatîfan awan kerê û peynîya mûlkê taybetî bîyarê. Beno ke no seba tayê kesan sey xeyalî bo la fînakê nê kerdenanê winasîyan zî tay nîyê. Bitaybetî Rojawanê Kurdîstanî de koperatîfî yenê ronayene. Gamê destpêke yê cuya kominale yenê eştene. Nê kerdenê winasî û şorişê Rojawanî hêvîyê ma kenî gird. Merdim xeyal û hewnê xo pey de şino. Dano ser rêça amancanê xo. Eke ma xeyal bikerê, amanca ma zelal bo, çîyêko nêbo çin o. Şorişgêrê Kurdîstanî yan diravî nêxebitnenê yan zî pirr tay xebitnenê. No zî mojneno ke cuya kominale û bêdirav bêîmkan nîya. Şorişgêrî bêçina û bêwerd nêmanenê. Keyberê kamî bicenê çina zî werd zî peyda beno. Çirê? Çunke şorişgêrî seba xo nêcuyenê. Cuya taybete awan nêkenê. Bi kilmî nêkewenê pey diravan. Kewenê pey manewîyat û amancî. Eke amanc kominal û pîya cuyayîș bo xora mana diravî zî nêmanena. * Dirav: pere, pul, para