To çekuya faşîst fekê xo de kerda avlençe. Çike faşîsto en girs ti ya.
Rejîma AKaPe hora rejîmade faşîst a. Ti zî na partiye ra en faşîsto girs a, Recepî ra tepiya.
Ma, kurdan tirkî tertele nêkerdê. Sima ma tertele kerdîme.
Ma, kurdî tirkî qedexe nêkeme. Sima zonê ma kenê qedexe.
Ma, kurdî renganê sima qedexe nêkeme. Sima renganê ma kenê qedexe.
Ma, kurdî televziyonanê sima qedexe nêkeme. Sima yê ma kenê qedexe.
Ma, kurdî nêvame tirkî de domonanê xo perverde mekerê. Sima zonê ma de heqa perwerde nêdanê û nêwazenê.
Ma, kurdî nêvame jû milet, jû desmale, jû zon, jû welat. Na felsefa sima wa.
Sima zafkulturiye jê letekerdena welatî vînenê. Ma zafkulturiye jê dewlemendiye, jê zamqî vîneme.
Sima verva zafkulturiye da pêro, Anadoliye gonî gonaşîrî de verdê. Ma o tertele ra zor xeleşayîme.
Waxtoke sima ameyî Anadoliye, ma sima rê çeverê xo kerdî ra.
Dima, sima çê ma marê kerdî hepisxaneyî.
Sima ermenî tertele kerdî, rumî tertele kerdî, asurî tertele kerdî. 
Sima xora qederî heqê herkesî destra guretî, her çî kerd tirk û tirkî. Sima Anadoliye de qomê bînî nêverdayî.
Sima, kam ke kistena Hrant Dînk de rolê xo bî, pêro terfî kerdî. Valiyê Estemolî, mudirê polîşî yê Estemolî û en peyecoy Ramazan Akyürek.
Waxtoke 2006 de polîs û eskerê sima Amed de domonî kiştî, Tayyip Erdoğan vat: domon, pîl, qiz, cenî û camerd, teqetê ma yê asayîşî karê xo kenê. Siyasetê sima na wo.
Sima wendekaran cenê zerre, çike înan polîtîka sima protesto kerda.
Hona ke mahkemî qerar nêdo, unîversîta sima nî wendekaran mektev ra erzena tever, ceza girane dana ci.
Sima tever ra kes nêverda, çike jûyî nusno, jûyî xevere virasta, jûyî semînar do.
Kam ke jê sima nêfikirîno, sima ey kenê hepis.
Ma, kurdî domonanê sima bomba nêkeme, se ke sima Roboskî de 34 domonê ma tertele kerdî û dima zî serkefermandarê xorê berxûdariye waste.
Çiyo niyanen qeyta aqilê ma zî nîno. Ma her tim birayenî waste, sima hukumdariye waste, na rîwal ra ma qirkerdîme û kenê.
Sima 4hezar dewê ma, zerrê bonan de însanê ma vêsnayî. Ma, kurdî çiyo niyanen nêkerdo û nêkeme.
Sima mara hona leborîne nêwasta û devam ra ma qirkenê.
Îşte xezna to yê tertelu, zor û zorvajiye na wa, ey faşîst!