Parlamentera HDPyî ya Wanî Dilşad  Canbaz Kaya averşîyayîşan ser o va ‘tecrîd tena Îmrali de çin o, heme Tirkîya de esto’ û wina dewam kerde: “Îqtîdar her roje propogandaya şerî keno. Fekê înan ra kiştiş, qetilkerdiş û çinkerdiş ra vîşêr çîyêk nêvejîyeno. Vera nêyî de ganî ma pîya û bi hawayo rêxistinkerde têkoşîn bidî.”

Rayberê Şarê Kurdî Abdullah Ocalan pêvînayîşê 7ê Tebaxe de bi mabênkarîya avûkatanê xo dîyar kerdbi ke o amade yo ke problem çareser bikero, labelê ganî aqlê dewlete zî çîyo ke hewce keno, bikero. No vengdayîş ra dima 3 şaredarîyê HDPyî ameybî xespkerdene û herinda hemşaredaran de qayûmî tayîn bîbî.

Parlamentera HDPyî ya Stenbolî Dilşad Canbaz Kaya derheqê averşîyayîşanê Tirkîya de Jinnews ra Zeynep Dûrgûte rê qisey kerd û bale ante tecrîdî ser. Kaya dîyar kerde ke şexsê Birêz Ocalanî de 2015 ra nata tecrîdêk esto û wina domnaye: “Vera nê tecrîdî de rayberîya Leyla Guvene û bi hezaran hepsîyan de çalakîyêk dîyaybî destpêkerdene. Ma hertim da zanayene ke tecrîd tena Îmrali de nîyo. No tecrîd Îmrali de dest pêkeno û heme Kurdan gêno mîyanê xo. No tecrîd herkesî ser o esto.”

Parlamenter Kaya dewamê qiseykerdişê xo de wina va: “Tecrîd bi bedelanê girdan qismêk zî bibo ame wedarnayene. Keye û avûkatî çend reyî şîyî pêvînayîşî kerdî. Gelo çi bedilîya? Gelo çira reyna tecrîd yeno domnayene?  Birêz Ocalanî pêvînayîşo peyên de vatbi ke o eşkeno hewteyêk de çareser bikero. Heyetê ma Hewlêr û Silêmanî de tayê pêvînayîşî kerdî. Ewro sere de Îmrali û xeylê zîndananê bînan de neheqîyî dewam kenî. Ewro çalakîyanê protestokerdişê qayûman rê daxî tehamul nêkenî.”

Nê demê peyênî yê îqtîdarî yî

Kaya daye zanayene ke çîyê ke Rojhelato Mîyanên de yenî cuyayene, tesîrê xo Tirkîya ser o zî kenî û wina va: “Tena serrêk de vaya gaz, cereyan û xeylê çîyan vaye bîyo. Hende çî vaye beno, labelê heqê karker, karmend û sewbîna qasê ci zêde nêbîyo. Şar mîyanê feqîrîye de cuya xo domneno, labelê ganî ma biewnîyî ke îqtîdar seba gule û sîlehî çiqas xerc kerdo. Seba ke propogandaya şer kenî, heme yewbînan miqate kenî. Ewro Wezîrê Karê Zereyî merdişê merdiman ra tena hetê hûmare ra gêno dest. Labelê ganî bêro zanayene ke nê demê peyênî yê îqtîdarî yî.”

Ganî ma pîya têkoşîn bidî

Kaya qiseykerdişê xo de va ‘polîtîkayê şerî krîzê ekonomîke hîna kûr kenî’ û wina qedênaye: “Vaya heme çî zêde bîya. Îqtîdar her roje propogandaya şerî keno. Fekê înan ra kiştiş, qetilkerdiş û çinkerdiş ra vîşêr çîyêk nêvejîyeno. Îqtîdar şer ra miqate beno. Vera îqtîdarêko winasî de ganî ma pîya û bi hawayo rêxistinkerde têkoşîn bidî. Seba wedarîyayîşê nînan ancak ruhêko hempar lazim o. Faşîzm tena bi têkoşînêko yewbîyaye û rêxistinekerde bin keweno. No tena probleme Kurdan nîyo, problemê heme Tirkîya yo. Ma Kurdî wazenî ke şer biqedîyo û aştîye bêro.”

 

WAN