Faşîzmê Dewleta Tirke, ke di şexsê Erdogan û Bahçelî de yeno rayirberdene, ver bi peynîya xo şino. Zilm û teroro ke nêy serrêy peyênan,di serre de Şaro Kurd, verva heme civatê Tirkîya yeno rayirberdene, ameyo merheleya xo ya peyêne. Hem zerre û hem zî teber de,her ke şîno qada manewrakerdişî ya faşîzmê Erdoganî û Bahçelî teng bena.
Konseptê îmhaya topyekûne ya faşîzmê Dewleta Tirke, bi tekoşîna Şarê Kurdî û Têgêrayişê Azadîye têk şi. Bêvengîya civatî ya serrê peyênan,bi çalakîyanê grevê veyşanîye ke bi verkêşîya Hemseroka KCD Leyla Guvene zîndanan ra amebî destpêkerdene,hem raya pêroyî ya zerreyî û hem zî ya mîyannetewî de bîy sebebê vengêkê pîlî.
Verva heme zext, êrîş û hovîtîyanê hêzanê Erdoganî, Vakûrê Kurdistanî de tay bê zî reyna çalakîyê girseyî yenê rodarvistene.Vaşûrê Kurdistanî de bi çalakîya Şeladize, dewleta tirke û hemkara aye rayiberîya PDK, şarê hereme ra sîleyêka girane werde.
Çalakîyanê grevê veyşanîye seranserê Ewropa û dinya de,riyo raştîn yê faşîzmê AKP-MHP deşîfre kerd. Êdî bawerîya raya pêroyî ya Cîhanî bi propogandaya dewleta tirke ya ke "ez verva terorî şerr kena" nêmenda. Bêhiqûqî û bêedaletîya faşîzmê AKP-MHP,êdî benê mijara rojdama parlamentoyanê welatanê Ewropa.
Di raporanê sazîyanê mîyannetewî êy wayir tesîrî de, êdî rayirberîya Erdoganî zê dîktatorîye, yena binamekerdene. Di qada mîyannetewî de bikarardişê na çekûye zaf bi mehne yo. Finaka tewir peyêne rewşa Serokê Venezuella Maduroyî de, xo nîşan da. Faşîzmê Erodogan û Bahçelî na rewşe ra zafêrî tersay û nêrazîbîyişo tewir tûj, hetê îanan ra ame nîşandayene. No nêrazîbîyişê înan, bi sebebo ke verva rayirberîya dewletêka xosere bi awayêko korsanwarî, mudaxele yeno kerdiş nê bi sebebo ke do rocêke dore bêro înan zî, bi.
Heke persgira mudaxeleyê serwerîya hikumatêkê meşrûyîbayêne,mudaxeleyê Sûrîya rê çira veng nîyame vetiş û rayirberanê dewleta tirke vatê, " ma do nimacê nîmerocî Camîya Emewî de bikerê". Xora Bahçelî badê rewşa Venezûella, no tersê xo bi awayêko eşkera ard ziwan û vat " La ke mêşt de Trump vaco ez şima nê Kiliçdaroglûyî nas kena, ma do se bikerê".
Di Rochelato Mîyanên de zî polîtîkayanê Dewleta Tirke îflas kerd. Peymana Îdlîbî, ke bi Rûsîya reyde amebî viraştene têk şî û di destê tirkîya de teqa. Çeteyê Erdoganî kewtîy ra yewbînîy û HTŞ Îdlîb destê ortaxanê Erdoganî ra girot. Nika seba xelesîyayişê na rewşe ra, Erdoganî û rayedaranê ey rayira Moskova, kerda rayira Hîcazî.
Pûtîn zî wazeno na tengasîya Erdoganî, di asta tewir berze de seba menfîetanê xo bi kar bîyaro. Seba naye zî roce bendêke vernîya Erdoganî de ronano. Tewir peynî peymana Edene ya 20 serre raver ke xeylê dewran ser ra derbas bîyo, seba naskerdişê Esedî, arde vernîya Erdoganî. Erdoganî zî neçarîye ra zê tucarêkê muflîsî bi çar lepikan xo eşt na peymane ser.
Xeyalê Erdoganî yê dekewtişê Vakûrê Sûrîya zî bi qerarê xoantişê Trumpî yê Sûrîya ra, têk şi. Herema biewleye ke qasêke hîvî dayê Erdoganî zî bi raporê peyênî yê Emrîka ke di çapemenîya dinya de ca girewt, amî asta " Wa TOKÎ oca de banan virazo".
Nêy heme tengasîy hewnê Erdogan û Bahçelî remnenê. Na rewşe bi awayêko eşkera di sîfet,qiseykerdiş, têgêrayiş û heletê rûhî êy Erdogan û Bahçelî de, zê tersêkê pîlî, xo nîşan dana.
Stratejîyê HDP yê Weçînayişanê Heremî, ke kurdistan de qewernayişê Xespkeran û metropolan de zî têkberdişê faşîzmî, bi sola peyêne ya ro ser nêy adirî û tengasîye. Cezaya ke ro Kişanak û Tuncele amî birrnayiş û reyna gefê peyênî êy Wezîrê Karanê Zerreyî êy verva Parlamenteran zî hêrs û cewabê na rewşe bi. Bi awayêko pêroyî rewşe naya û Faşîzmê Dewleta Tirke têk şino.
La no nîno mehneyê paştîye ser rakewtişî, gere Şaro Kurd tekoşîne zafêrî berz bikero. Tarîxî nîşan dayo ke faşîzim bê tekoşînêka bihêze têk nêşino û her wext şikeno xo newe ra gîyan bikero.