Bi îlanbîyayîşê Federasyonê Rojawanî heme kurdî kêfweş bîyî, labelê tenya PDK û dewleta tirk-AKP û Erdogan kêfweş nêbîyî. PDK bi fermanê AKP kêberê Semalka girewt û Tirkîya zî çeteyê DAIŞ ra hetkarîya xo kerd vêşî. Roşnvîrê kurdî babete ser o qisey kerdî û vatî ke Federasyonê Rojawanî seba çareserkerdişê krîzê Rojhelatê Mîyanî modelekê tewr baş o.
Herkes hetkarî bido
Nuştoxê Rojnameyê Hewalî Burhan Hecî Suleyman’î aşkere kerd ke Federasyonê Rojawanî seba ameyoxê kurdan wayîrê muhîmîyekê zaf gird o û wina vat: “Wa her kurdêk hetkarî bido Federasyonê Rojawanî. Îlanê federasyonî ma weş zanenî ke netîceyê demekê zehmet de, têkoşîneke zor de vejîya. No serkewtiş dûştê pêroyî hêrişê çeteyanê DAIŞ, dewleta tirk û hêzê heremî de vejîyayo meydanî. Sîstemê sîyasî, ekonomî û komelî eşkeno mîyanê no modelî de aver şirî, çareserîya raşt, cuya adîl û hempar no model o.”
Çareserîya realîst
Roşnvîrê kurd Seyîd Muhammed’î zî modelê federasyonî zey modelekê realîst biname kerd û qiseyê xo wina ramit: “Mîyanê şertê herem û dinya de kurdan zey modelo tewr realîst federasyon weçînayî. No weçînitiş zaf muhîm o. Ez Federasyonê Rojawanî pîroz kena. Kurd, eşkenî federasyon ya zî xoserî îlan bikerî la modelo tewr rind federasyon o. Rojawan de kurdan bi quwetê xo dûştê hêrişê tewir bi tewir de xoverdayîşeke gird aver berdî û federasyon vetî meydanî. Kobanê û pêroyîya Rojawanî de xoverdayîşeke qehremanî ame dayîş, seba bidestvistişê heqê kurdan dîrokî yo, no xoverdayîş hema zî domyeno.”
ANF/KERKUK