Festîvala 17. ya Xoza û Kulturî ya Mûnzûrî ke hetê fermanê walitîyê sûk amê qedexekerdiş, qedexeyan nêsilasnena. Festîval merkez û qezayan de bi aktîvîteyanê cîya cîyayan, ramena.Pûlûr, Xozat û Mazgerd de aktivîteyê ciya ciyayan virazîyay.
Festîvala Xoza û Kulturî ya Mûnzûrî ke serra 2000î ra na het virazîyena, badê pêrokîn amadekarîyan hetê walitîyê amê qedexekerdiş. No qedexe raştê hêrs û nêrazîbîyayîşanê partîyanê sîyasî, sazîyanê civaka sivîl, hunermend û Dersimijan ame. Temsîlkaranê partî, rêxistin û sazîyanê Dersim qedexeyê bêmane yê dewlet nêsilasna û 27ê Temmuze de Meydanê Seyîd Riza de, bi dayîşê îzahatekê ortex startê festîval day. Festîvala ke bi pêşengtîya Federasyonê Komeleyê Dersim (DEDEF) de merkez û qezayanê Dersim de ramena, bi nawîyayîşê tîyatroyê kuçe, bi goşdarîkerdişê muzîk û kombîyayîşanê şarî dewam kena.
Hetê komanê xoser aktivîte virazîyenê
Rîwalê qedexeyê qeyûmî festîval zey ke amê plankerdiş bi temaya “Festîval yê şarî ya, OHAL û awbendan rê nê” bi formatêka merkezî nêvirazîyena. Bê ke temayêka merkezî bibo, aktivîteyê festîval hetê komanê xoser ra virazîyena.
Çarçeweyê festîval de Pûlûr de qeraxê Çemê Mûnzûrî de kamp ronîya û welatijê ke kamp de manenê, kilamanê Koma Mûnzûrî goşdarî kerdî û goveng girotî.
Têkoşîn zîhnîyetê qedexeyî keno zeîf
Qezayanê Dersim Mazgerd û Xozat de zî çarçoveyê festîval de kombîyayîşê şarî virazîyay. Parlementerê Partîya Demokratîk yê Şaran (HDP) yê Stenbolî Erdal Ataş ke tewrê kombîyayîşan bi, hayr ant zîhnîyetê qedexeyî ser. Ataşî vist vîrî ke têkoşînê înan zîhnîyetê qedexeyî keno zeîf û aşkere kerd ke rijnayîşê no zîhnîyetî nezdîyo, ganî têkoşîn bîro berzkerdiş.
Şolenê muzîk û tîyatroyê kuçe
Merkezê sûk de zî verîya festîval bi rojan Meydanê Seyîd Riza de xeylê standî amey ronayene. Herzewbîn şolenê muzîkî ke hetê muzîsyenanê kuçe yeno dayen û musnayîşê tîyatro raştê eleqeyê gird yê welatijan yeno. Kayanê tîyatro de temaya zextê îqtîdar yê ser medya û manîpulasyonê ke medyaya hawuz kena yeno musnayîş.
DÎHABER/DERSIM