Festîvala Dersim yê Awrûpa ewro sûka Almanya Frankfûrt de bi panelê “Pencike qirkerdişî de Dersim” destpa kena. Roja Şeme de zî do bi hezaran Dersimijî û dostê ci bîrê têhet û polîtîkayanê qirkerdişî rê vajê bes o.
Festîvala ke hetê FEDA, FDG, ADEF bi şîyara “Qirkerdişê xoza, kamî, îtiqat û kulturî rê nê” yena organîzekerdiş, ewro Meydanê Rebstockpark de, destpa kena. Festîval do bi panelê “Pencike qirkerdişî de Dersim” saet 17:00 de destpa bikero. Panelo ke moderatorîya ci Ayten Şîmşîr kena, do Kazim Cîhan, Cemal Taş, Zîlan Dîyar û Erdogan Yalgin zey panelîstî tewr bibê. Saet 20:00 de zî do hetê Pîr Seyfî Mûxindî Cemê yewîye bîro giroten.
Doja diyîn yê festîval (Meşt) do bi desan temsîlkarê sazîyan û sîyasetmedarî tewrê festîval bibê û mesajanê xo bidê. Herzewbîn cayê festîval de, do xêlê standî bîrê ronayene. Seba domanan zî do cayê kaykerdişî ronîyê û pedagog û perwerdekarê domanan wezîfe bigîrê. Merasîmê veyveyê Dersim do emserr zî dewam bikero.
Roja diyîn yê festîvale
Xêlê sîyasetmedar û temsîlkarê sazîyanê Dersim zî dê tewrê festîval bidê. Parlamenterê Dersim Alîcan Onlu, Sîyasetmedar Hatîp Dîcle, Şaredarê Pûlûr M.Fatîh Maçoglû, Şaredarê Mêzgir Tekîn Turkel, Serokê FDG Metîn Bozdag, Serokê ADEF Muharrem Erdogan, Hemseroka FEDA Bedrana Yildirim, Serokê DEDEF Ahmet Balkis, endamê Meclîsê ‘Wa Mûnzûr bê bende pêl bido’ Bariş Yildirim, Hemserokê HDK-A Demîr Çelîk, Parlementerê Partîya Çep yê Alman Andrej Hunko, Verfekê AGADEKA Dîmîtrîos Konstantînîdîs dê tewrê festîval bibê û mesajanê xo bidê.
Kom û hunermendê Dengê Xwezayê, Grup Mûnzûr, Gulseren Kiliç, Ûmût Altinçag, Hasan Saglam, Yekşa, Kadrî Karagoz, Hasan Alî û Grûp Sîmûrg dê festîval de bivejyê ser sehne. Herzewbîn grûba tîyatro yê kirmanckî Arêyê Kay zî do festîval de sehne bigîro.
Adresê festîvale: Rebstockpark, Am Römerhof 9, 60486 Frankfurt a.M.
FRANKFÛRT