Festîvale bi coşêko gird qedîyaye

DÎREN KESER/PÎRHA/MÊRSÎN

10. Festîvala Şarê Karaduvarî ya ke her serre bi hawayo sîstematîk yena organîzekerdiş, emser zî bi şîyarê‘Sereyê xo wedarne û ameyoxe ra biewne’ameye viraştiş. Festîvale bi temamî hetê ciwan û domananê taxe ra ameye organîzekerdiş û 2 rojan dewam kerde. 

Festîvale de grûbê muzîk û tîyatroyî vejîyayî sehne û eleqeyêko gird ame nawitiş. Festîvale de meşîyayîşo meşaleyin ame viraştiş. Festîvale ra dima Hunermend Gokhan Şîmşekî qisey kerd û derheqê festîvale de malumatan pare kerd. 

Hunermend Şîmşekî bale ante muhîmîya viraştişê festîvale ser û wina va: “Festîvale bi temamî hetê ciwan û domananê taxe ra ameye amadekerdiş. Na festîvale seba wayîrvejîyayîşê kultur û ziwanê dayîke ameye viraştiş. Emser festîvale raştê Roşanê Qurbanan û 1ê Êlule Roja Aştîye ya Cîhanî ameye; cok ra muhîmîya festîvale zêde bîye. Ma ameyeyêka aştî û huzirin wazenî.”