Rojnameger û xebatkarê Newroz TVyî Herman Mavaneyî derheqê prosesê şer û polîtîkayê dewlete yê ser herême de vînayîşê xo ard ziwan.
Rojnameger Mavaneyî va ‘tarîx ra nata şarê kurd her tim azadî û aştîya şaran waşto’ û qiseykerdişê xo wina domna: “Rewşa ke ewro ma tede yî, netîceyê nezanî û safîtîya ma ya. Vera waştişanê ma de dewletê tirk, ereb û farisan qet bi biratîya kurdan bawer nêkerdî û nê dewletî vera şarê kurdî de tim mîyanê kayan de bîyî. Ganî ma vatiş û sîyasetê klasîkî ra fek verabidî.”
Firsendê tarîxî
Mavaneyî bale ant rewşa Îraq, Sûrîye û Tirkîya û wina va: “Rewşa hemînan çiman ver de ya. Kerra ser kerra de nêmendo. Firsendêko tarîxî ameyo berê ma ver, eke ma xo bidî ser, ma do bibî wayîrê qezencêk. Eke kurdê Başûrî erdê Başûr de vera estena leşkeranê tirkî de, kurdê Rojawanî vera hêrişanê tirkan de helwestêko hîna wişkêr nîşan bidî, o wext hem Rûsya û hem zî Amerîka do nêverdî ke dewleta tirk mabênê Kobanê û Efrînî dagîr bikero. Cok ra eke kurdî nê firsendê tarîxî qurbanê menfîetanê xo yê şexsî û partî nêkî, do serkewtişêko tarîxî qezenc bikerî.”
FERÎT DERE / DÎHABER / ANQARA