Serra 2011î ra na het şarê Sûrîye lejê serbestî danê. Bi na waşten dûştê rejîmê Baas serre wedarnay. La rîwalê ke rejîmê Baas bi qetlîam û kiştişan cewab da nê waştenan welat de lejê mîyanî rameno. No lej tenya lejê Sûrîye nîyo, lejê Amerîka, Rûsya, yê Îran û yê xêlê quwetanê heremî û mavênneteweyî yo. No lejî ra raya xelesnayişê tenya ravey berdişê projeyê Sûrîyeya Demokratîk o. Şoreşa Rojawa ke 19ê Tîrmeh 2012 de destpa kerd zî cewherê xo de tekoşînê xelesnayişê pêrokîn Sûrîye û demokratîzekerdişê ci yo.
Çarçoveyê no proje de Quwetê Sûrîye ya Demokratîk Vakûrê welatî de roj bi roj hemleyê newî ravey benê. Hemleya peynî zî vera Minbic de virazîna. Operasyono ke bi aşmano yeno pawiten destpa kerd. Quwetanê Sûrîye ya Demokratîk, Konseyê Lejkerî yê Minbic bi paştdayişê quwetanê Koalîsyonî 1ê Hezîran de destpa operasyonê xelesnayişê Minbic kerdî. Operasyon vakûrrojhelat û Başûrrojhelatê bendawê Tişrîn ra destpa kerd. Çarçoveyê no operasyonî de xêlê dew û mintiqeyî çeteyan ra amey xelesnayen.
Minbic çima hendayî muhîm û stratejîk a? Tarîxê sûk reseno heta Asûrijan û heta seserra peynî sûk wext bi wext kewta bindestîya xêlê împaratorîyan. Minbic ser raya tîcaret ke Heleb ra şina Riha de ya. 2003î de nifûsê ci nezdîyê 100 hezar bi. Minbic mavêna Tirkîye û navendê DAIŞ Reqa de yo. Herzewbîn mavênê Heleb, Cerablûs, Kobanê û El Babî de yo. 30 km dûrê Çemê Firatî de yo. Sûk de şarê ereb, kurd, çerkes û şarê bînî estê. Girotişê sûk do derbeyekê gird DAIŞ ro do. Damara DAIŞ do bibirnîyo. Badê girotişê Minbic çormeyê Jerablûs kî do bîro giroten.
Rîwalo ke Minbic bi hardê Tirkîye ra sînor o çeteyî na xet zey xeta lojîstîk û ravêrnayişê Sûrîye şixûlnenê. Cok ra na sûk cayekê stratejîk de ya. 2011î de kewt bindestîya SÛK, 2014î de kewt bin hikmê çeteyanê DAIŞ. Çeteyan qanûnê şerîat ferzê sûk kerdî. Herzewbîn cenîyan zî hepsê keye kerdî, qanûn vetî ke cenî tenya bi serreyê xo nêşkenê bivejyê kuçeyan. Wexto ke bivejyê zî gerek çarşefa sîya xo de rê. Meclîsê Eskerî yê Minbic aşkere kerd ke badê xelesnayişê Minbic îdareyê sûk do bidîyo Meclîsê sûk. Quwetanê operasyonî zî aşkere kerdî ke mijdanîya Minbic a azad nezdî ya.
Serva kurdan zî xelesnayişê sûk zaf muhîm o. Çike badê girotişê Minbic dor do bîro sûkanê bîn yê çormeyê Kantona Efrîn zî. Bi çeteyan ra pakkerdişê na mintiqe ra pîya, gam bi gam kantonê Efrîn û Kobanê resenê pê. Endî herem de dewrê şaran destpa keno. Sûrîyeya Demokratîk do her zewbîn serva pêrokîn Rojhelata Mîyanî bibo modelekê rind û dermanê pêrokîn dirbetinan.
Xo ra tersa AKP zî nayî ra ya. Dişmena şarê kurd AKP ya ke hewl dana xo biresno hawara DAIŞ. La endî serva qedînayişê artêşa tecawuzkar û kiştox mordnayişê peyser şîyayiş destpa kerd. AKP zî do hesabdayîşê pîyakarîya sûcan ra nêxelesîyo.