Quwetanê artêşa Irak bado ke dewa Kanî Ebbas çeteyan ra xelesnay verê xo day dewa Kanî Heramî û bi poştdayişê quwetanê koalîsyonî no ca zî xelesna. Çeteyê DAIŞ sivîlê ke wazenê Mûsil ra bivejyê manî kenê. Rîwalê herbî nezdîye mîlyoneke ronişteyê Mûsilî ver raya goçî de yê.
Peynîya Erdoganî do zey Seddamî bo
Heto bîn ra Wezîrê Pawitişî yê Tirk Fîkrî Işik îdia kerd ke seba ke quwetê înan asmenî ra tewrê operasyonî bibê, înan bi quwetanê koalîsyonî ra pêkerdî. Derheqê na îdia de heta nika kişta hukumetê Iraq û quwetanê koalîsyonî ra beyanat nêamê.
‘Wexto ke DAIŞ kewt Iraq Erdogan kotî de bi?’
Mişawîr Lejkerî yê Iraq Wefiq Samerayî zî da zonayen ke ê tewrbîyayişê Tirkîye yê operasyonî qebûl nêkenê. Samerayî aşkere kerd ke eke Erdogan na sîyasetî de israr bikero, do peynîya ci zey Seddamî bo. Verra israrê tewrbîyayişê operasyonî yê Tirkîye jû nêrazîbîyen zî lîderê Tirkmenan Ebû Mistefa Îmamî ra amê. Lîderê Haşd El Şabî yê Kerkuk Ebû Mistefa Îmamî persa “Wexto ke DAIŞ kewt Iraq Erdogan kotî de bi?” kerd û wina va: “Wexto ke çeteyî kewtî Iraq, Telafer Tirkîye jû beyanatekê zî nêda. O wext kotî de bî? Çima hendayî pawitî? Yê ke Telafer de amey qirkerden Tirkmenî nêbî?
NAVENDÊ XEBERAN