Gama sifteyîne ya dîktatorî yo

Pêşnîyazê qanûnî ya bedilîyayîşê qanûno bingeyî ke 18 madeyan ra pê yeno, bi 339 reyan Meclîs ra derbaz bî. Çarçeweya nê pêşnîyazî de selahîyetê îlankerdişê OHALî û betalkerdişê meclîsî dîyeno Serekkomarî. Reyna goreyê nêyî mehkemebîyayîşê Serekkomarî hîna zehmetin beno. Temsîlkarê Sazîyê Komelî yê Sîvîlî babete ser o qisey kerdî.Hemserekê SESî Ramazan Kaval: No bedilîyayîşê qanûno bingeyî do Tirkîya hîna zaf ver bi tepîya bîşêro; çimkî dest nêdîyeno 4 madeyê sifteyînî ke ganî bêrî bedilnayîş. No bedilîyayîş destê Serekkomarî hîna qewetin keno û mehkemebîyayîşê Serekkomarî girêdayeyê 400 îmzeyanê parlamenteran beno. Reyna selahîyetê betalkerdişê Meclîsî destê Serekkomarî de esto. Ma çîyêko winasî qebul nêkenî. 

Do probleman hîna xorî bikero

Serekê ÎHDyî yê Şûbeya Amedî Racî Bîlîcî: No qanûno bingeyî yê wextê derbe bî û ma waştênê ke no qanûno bingeyî sere ra heta peynî bêro bedilnayîş. Eke wina bîyêne o wext do hetê cîyayî zî mîyanê qanûno bingeyî de ca bigirewtênê. No qanûno bingeyî do problemanê Tirkîya hîna kûr bikero. Na rewşe şaranê Tirkîya eciz kena. Cok ra ganî her kes bikewo hereket. Hemserekê Egîtîm Senî yê Şûbeya 1î yê Amedî Îkram Atabay: Qet şik çin o ke qanûno bingeyîyî pêameyîşê komelî yî û goreyê lazimîya komelî şekil gênî. Bedilîyayîşê ke qanûno bingeyî de yenî viraştiş, bi îradeya şarî yenî viraştiş, labelê welatê ma de wina nîno kerdiş. 2 partîyî goreyê xo bedilîyayîşan virazenî û wazenî zorî reyde bi komelî bidî qebulkerdiş. Ez bawer kena ke do şar referandum de nêyî vajo nê, eke wina nêbo do problemê cîddî bivejyî.