Sek yeno zanayîş çend rey Kobanê rê hêrîşê bombeyîn virazîyabî û nê herîşî pêro zî Tirkîya sero verê çimanê leşkeran de virazîyabî.
Wexto ke YPG Girê Sipî destê çeteyan ra xelesna û azad kerd, çeteyê DAIŞî Girê Sipî ra remabî zafê înan mîyanê sîvîlan de vîyartibî kişta Tirkîya. Parlementerê HDP na mesela berdibî heta meclîs û waştibî wa çeteyê DAIŞî bêrê tepiştiş. Hemserekê HDP zî vatibî ‘beno ke çeteyî Tirkîya de zî bombeyan biteqnî’ Rojnemegerî zî semedê ameyîşê nê çeteyan walîyê Riha Îzzetîn Kuçukî ra vatibî ‘Gelo Riha de çeteyê DAIŞî estê’? La walî hêrs bibi, înkar kerdibi û dima ra zî ê rojnamegerî hetê polîsan ra ameybî tepiştiş.
Nê rojan de tikê çeteyê DAIŞî hetê polîsan ra ameyê tepiştiş la onca newe ra serbest ameybî veradayîş. Îstanbol de 21 kesan ra 20 kesî serbest ameyê veradayîş.
Her tim ame vatiş ke Tikîya û Kurdistan de banê hucre yê çeteyanê DAIŞî estê la qet îdarekerê dewlete goş nêda ney vatişan.
Çeteyê DAIŞî en peynî 25ê hezîrane de Tirkîya ser o pê wesayîtê bombedekerdeyan eştibî Kobanê ser û 200î ra zêde welatîyê sîvîl hetê çeteyanê DAIŞî ra ameybî qetilkerdiş. Îdarekerê Tirkîya onca xo kerdibî heqdar û vatibi “şima zur kenîy qet eleqeya ma çeteyan dir çîn ya.” Gorê hukimata AKP rê her kes zur kerdênê tenya raşt vatên. Heme dinya zanayên ke Tirkîya paşta yê çeteyan de ya, la AKP nê îddayî qet nêgirewtî xo ser.
Verê çimanê leşkeran
Çeteyê DAIŞî zî heta nika partîya Fîlîstîn Hamas, El-Qaîde, Talîban, û pêro Dewletî tekfîr kerdî, dişmen îlan kerdî, la Tirkîya û serekkomar Recep Tayîp Erdogan tekfîr nêkerdî û xo rê sey dişmen nêvînayî. Her kes dişmenê DAIŞî bi la Tirkîya dişmen nêbî.. Çeteyê DAIŞî tewr peynî Qezaya Kîlîs Elbeylî ra dest û qolê xo şayê têra û pê komşibî Rojawan. Tirkîya semedo vernîyan îddayan bigêro sewqîyatê leşkerî kerdênê.
Merdim vano belkî Tirkîya tedbîr gêna la raştîya mesela wina nêbî. Esas de falîyetê çeteyan sînor de dom kerdênê. Onca çeteyê DAIŞî çend rojî ke Celabrus de cîranê leşkeran ê û verê çimanê Leşkeran de mayînan nonî ro. Onca çeteyê DAIŞî nêweşxaneyanê Tirkîya de zaf rehet tedawî benê û Dewlete heta nika hem heqê hiquqî de hem zî hetê tedbîran de çîyêk nêkerd, nêkena. Çeteyê DAIŞî ke sînorê Tirkîya ser de her tewir mîyanê rehetî de yê mîyanê nê aşmanê peynînan de Edene, Mersin û Amed de pê bombeyan hêrîşê HDP kerdibî. Ma fehm kenê ke no hêrişo peyîn game bi game ame.
Verê çimê dinya de tertele
Nê çeteye wehşîen en peynî vîzîr pê bombeyan eştê ciwanan ser û 32 ciwanê endamê SDGF qetil kerdî. Na hedîse de zî hetê Dewlete ra qet tedbîrêk nêame girewtiş û welatîyê sîvîl verê çimanê esker û polîsan de hetê çeteyan ra ameyê qetlkerdiş. Nika en zaf nê çî meraq benê. Gelo Tirkîya nika ra tepîya semedê pawitişê welatîyanê Tirkîya tedbîrêk gêna yan zî nêgêna.? Eşkena DAIŞ dir şer bikero yan ney? Sînorê xo DAIŞ rê qefelnena yan ney.? şervanê YPG û YPJ ê ke verê çimanê heme dinya de nê çeteyan dir mucadele kenê sey demo verîn dişmen vînena yan ney? Zeman do cewabê nê persanê ma bido. Semedo ke polîtîkaya AKP a teberî îflas kerda û bîya pûç her kes paweno wa tirkîya polîtîkayanê verînan ra fek verado.