Platformê NÊ yê Ewrûpa vist vîrî ke welatê dûştê faşîzmî vetiş çin o û aşkere kerd ke AKP problemekê wertex a; ganî herkes tewrê xo damûsno.
Platformî derheqê kirêşnayîşê polîtîkayanê ‘dişmenkerdişî’ û dîktatorî hetê Awrûpa û yê AKP de îzahateke da. Îzahatî de vajîya ke îxtîdara ke welatê xo de açarîya makîneya sûcî, seba welatijan ‘Ya’ de îkna bikero, bi welatanê Ewrûpa ra, çarçoveyê planekê de destpa pirodayîşan kerd.
AKP makîneya sûcî ya
Platformê NÊ yê Ewrûpa vist vîrî ke AKP makîneya sûcî ya û wina va: “Avusturya, Almanya, Swîsre, Hollanda kombîyayîşê AKP qedexe kerdî. Îtîfaqê faşîst yê AKP-MHP seba reyanê 3 mîlyon weçîntoxan bigîro, hewl dana ke dişmenîya Kurdan, elewîyan û zihnîyetê DAIŞ Ewrûpa de ganî bikero. Bi na polîtîka weşîya 10 mîlyon koçberan zî vistnena mîyanê taloke. Rîwalê vilakerdîşê nê polîtîkayanê qilêrîn tetîkkeşanê xo rişena çehar leteyanê dinya. AKP ya ke behsê serbestîye kombîyayîş, fikir û çapemenî kena, welatê xo de xo ra bi sabiqe ya. Koçberî rîwalê nê polîtîkayan nêrehetîye. Reîscûmhûro ke welatê xo de hiqûq nêsilasneno, hewl dano ke Ewrûpa de gureyanê propaganda biramno. Qeraro ke welatanê Awrûpa girewt, ca de yo, rewa yo. Welatê xo de ê ke bi hawayo bêhiqûqî sîyasetmedaran eşt zîndanî, bajaranê zey Cizîr, Sûr, Nisêbîn ûsb. de destûr nêda ke sîyasetmedarî dekewê ci, ê ke bi aşman dew û bajaran girewt bin ablûqa û vetiş û dekewtişan qedexe kerd AKP bi xo yo. Helbet yê ke nînan kenê rê, tenya Ewrûpa nê, ganî her ca qedexe bibo.”
Ganî Ewrûpa ambargo rono
Platformê da zonayen ke goreyê hiqûqa mîyanneteweyî û rûmetê însanîyetî faşîzm, nîjadperwerî û qirkerdiş sûc o û aşkere kerd ke destûr nêame dayen ke polîtîkayê gonîn û qilêrînî yê AKP-MHP-Erdogan’î bikirêşîye Ewrûpa. Ganî dewletê Ewrûpa hetê sîyasî, dîplomatîk, ekonomîk û lejkerî de ambargo rono û nêbo pîyakarê sûcanê AKP.”
Vengê xo berz bikerî
Platformê NÊ yê Ewrûpa hayr ant provakasyonanê AKP ser û dîyar kerd ke zey platform dê şaran het de bê. Îzahatî de aşkere kerd ke wezîfeyê sifteyîn vistişê perdeyê îtîfaqa qilêrîn yê AKP-MHP yo û qedîya: “Ma îqaz kenê; ma dê bi pêrokîn quwetê xo dûştê polîtîkayanê faşîstînî de vinderê. Hikûmeta AKP û Tayîp Erdoganî heta ewro bi saya bêvengîya welatanê rojawayî û barazîya şerî vera Kurdan, elewîyan, mûxalîfan, rojnamegeran, akademîsyenan polîtîkayanê qilêrîn ramit. Nayî ra ganî raya pêroyî yê Ewrûpa vera dîktatorî û qetlîamanê AKP de vengê xo berz bikerê.”
NAVENDÊ XEBERAN