Vera vatişê Neçîrvan Barzanîyî de reaksîyonî her ke şono zêde benî. Sîyasetmedaro kurd Dr.Fayîq Gulpîyî dîyar kerd ke PKK çar parçeyê Kurdistanî paweno û banî Barzanî ozrê xo kurd û PKK ra biwazo. Parlamenterê HDPyî Îmam Taşçierî zî va ‘eke yewîye bibîyêne, ti kurdî dişmenan ra hêvî nêkerdêne’.
Herçiqas ke Erdoganî wextê Referandûmê Xoserîye de vatbi ‘eke ma hênî padî, karê înan qedîya, Heme ameye û şîyayeyê înan qedîyeno’ weçînayîşê 24ê Hezîrane ra dima Serekwezîrê Îdareyê Herêma Kurdistanî Neçîrvan Barzanîyî Erdogan gêra û ey pîroz kerd. Barzanîyî dima ra îzehet da çapemenîye û dîyar kerd ke ê do destek bidî operasyonê Qendîlî.
Babete ser o sîyasetmedaro kurd Dr. Fayîq Gulpî û Parlamenterê HDPyî yê Amedî Îmam Taşçierî qisey kerd. Sîyasetmedaro kurd Dr.Fayîq Gulpîyî vera vatişê Neçîrvanîyî de reaksîyon nîşan da. Gulpîyî dîyar kerd ke Barzanî vano ‘PKKyî herêmêkê Kurdistanî dagîr kerdo’ labelê aqilê merdimî vatişêko winasî nêgêno û wina domna: “PKK partîyêka Kurdistanî ya û domananê çar parçeyanê Kurdistanî ra pê yena.”
Gulpîyî dewamê qiseykerdişê xo de hêrişê çeteyanê DAIŞî da vîr û wina va: “PKK seba çar parçeyanê Kurdistanî têkoşîn dano. Eke PKK nêbîyêne, çeteyê DAIŞî do Hewlêr, Şengal, Mexmûr û Behdînanî dagîr bikerdêne. PKKyî sînorê herêma Kurdistanî pawit. Ya raşte, eke veng nêdayêne PKK, PKK do reyna zî dewe û bajaranê Kurdistanî bipawitêne. Ez Barzanîyî şermizar kena; ti feydeyê ci kurdan rê çin o. Tena dişmenanê kurdan rê feydeyê ci esto. Barzanî ganî kurd û PKK ra ozrê xo biwazo.”
Eke yewîye bibîyêne, wina nêbîyêne
Nê vatişê Barzanîyî mîyanê raya pêroyî ya Kurdistanî de bîyî sebebê reaksîyonan. Parlamenterê Amedî Îmam Taşçierî ke demêko derg o çarçewaya xebatanê yewîya neteweyî de xebetîyeno, babete ser o qisey kerd. Taşçierî vera vatişê Barzanîyî de reaksîyon nîşan da û wina va: “Vindetişê Barzanîyî hetê kurdan ra çîyêko dejin o. Herêma Kurdistanî ya Federe 26 serrî yo statuyê dewleta xosere de ya, labelê mîyanê partîyanê sîyasîyan yê herême de ti dîyalog çin o.”
PDKyî nêşênayêne bikero
Taşçierî qiseykerdişê xo de bale ant ser hêrişo ke vera Kerkûkî de bi û wina va: “Hêrişê Kerkûkî ra dima ganî aktorê sîyasî mîyanê yewîye de bibo. Eke kurdî yewîya xo awan bikerdêne, ti partîya sîyasî yan zî dezge dîktatorê welatêkî ra hêvî nêkerdêne. Cok ra ganî kurdî teselî yewîya xo awan bikerî. Eke yewîye bibo, kurdî çîyêko winasî reyde têrî nêmanenî. Vatiş û vindetişê Barzanîyî tarîx de bi desan cayan ameyî cuyayene. Rewşê winasî zaf reyan ameyî cuyayene. Eke kurdê Başûrî biameyêne têhet, PDK nêşênayêne wina bikerî.”
AMED