Hetkarê Fermandarîya Pêroyî ya Ceyş El-Siwarî Ehmed Ebû Eracî derheqê planê Tirkîya yê herême ser û bazarîya ke dewleta Tirkîya hêzê çekdaran ser ro kena de qisey kerd.
Ebû Eracî qiseykerdişê xo de dîyar kerd ke ‘hêzê çekdarî yê xerîbî Tirkîya ser ro derbazî Sûrîye bîyêne’ û wina va: “Zafaneyê grûbê çekdarî yê ke derbazî Sûrîye bîyî, girêdayeyê MÎT î. DAIŞ bin kontrolê Tirkîya û zaf dewletan de ameyo awankerdiş.”
Tirkîya tirawena
Ebû Eracî dewamê qiseykerdişê xo de va ‘Tirkîya her roje îdîa kena ke dostê şarê Sûrîye ya, la dewleta tirk Sûrîye ra mîrasê tarîxî tirawena. Tirkîya bi piştîdayîşê grûbê radîkalî yê sey El-Kaîde, muxalefetê Sûrîye qedênayo. Finakê tewr baş yê nêyî zî Îdlîb de ameyo ciwîyayîş. Dewleta tirk heme grûbê çekdarî yê başûrê Helebî û vakurê Hama anto û çarçeweya operasyonê ‘Firat Kalkani’ de beşdarê dagirkerdişî kerdo. Dewleta tirk bi no hawa vernîya rejîmê Baasî akerde.”
Wa kontrolê Tirkîya ra bivejyî
Ebû Eracî peynîya qiseykerdişê xo de va ‘Tirkîya seba Babî Heleb rote’ û qiseykerdişê xo wina qedêna: “La ma nêyî nêzanî: gelo operasyonê Firat Kalkani de Bab eşkîyeno bêro girewtiş? Ez veng dana muxalîfan, wa muxalîfî bin kontrolê Tirkîya ra bivejyî; çimkî senî ke Heleb de bî do Îdlîb de zî Tirkîya do înan biroşa. Ganî çîyê ke Heleb de û Dareya de ameyî ciwîyayîş ra ders bêrî vetiş. Ganî nêro vîrîkerdiş ke Tirkîya eşkena yewna rey seba menfîetanê xo înan biroşa.”
ŞERVÎN MISTEFA / ANHA / EFRÎN