Her ke şono tecrîdo ke Rayberê Şarê Kurd Abdullah Ocalanî ser de yeno meşnayîş hîna giranêr beno û rojê peyênan de zî medyaya komelkî ser o xeberê spekulatîfî yenî parekerdiş. Herçiqas ke Serdozgerîya Komare ya Bûrsa no het de îzehet daye, labelê reyna zî etirê şarî derbaz nêbî. Bi rojan o xeylê cayan de şar payan ser de yo. 

Babete ser o Hemsereka Kongreya Komelê Demokratîkî (KCD) Leyla Guvene û Endama Dîwanê KCDyî Salîha Aydenîze qisey kerdî. Guvene va ‘nika Ocalan ti heqî ra nêşêno feyde bivîno’ û wina dewam kerde: “Rewşa normale de heqê ci yê telefonî, pêvînayîşî û sewbîna estî. Labelê eke dewlete biwazo pêvînayîş beno, nêwazo nîno kerdiş. 19 serrî wina derbaz bîyî.” 

Guvene dewamê qiseykerdişê xo de va ‘dewlete bi polîtîkaya tecrîdî qanûno bingeyîyê xo zî pelçiqnena’ û wina domnaye: “No goreyê qanûnanê Tirkîya û yê mîyanneteweyî suc o. Ocalan îradeya bi mîlyonan kesan o û zaf projeyê ci yê muhîmî estî. Eke Ocalan qisey bikero, Rojhelato Mîyanên rê aştî yeno. No hetê hêzê serdestan ra yeno zanayîş cok ra nêverdanî qisey bikero. CPT zî dirîtî keno. Ganî Ocalan azad bibo û seba aştî rolê xo kay bikero.” 


Wa şarê ma hesas bibo

Guvene peynîya qiseykerdişê xo de wina va: “Şarê ma yê Ewropa bi rojan o payan ser de yo. Ma çalakîyanê şarê xo silam kenî. Ganî çar parçeyê Kurdistanî û heme cayê dinya de şarê ma biwerzîyo payan ser. Ma cinîyî na rewşe qebul nêkenî û ma do rayberîya nê prosesî bikerî. Wa şarê ma hesas bibo.” 


Seba ke kaos nêbo pêvînayîş

Aydenîze va ‘Ocalan şexsîyetêko normal nîyo’ û wina dewam kerde: “9ê Teşrîna verêne de prosesêko komploye dîya destpêkerdiş û o proses hîna dewam keno. Ocalan 6 serrî yo ke avûkatan reyde, yew serrî yo ke zî keyeyê xo reyde pêvînayîş nêkeno. Nika tecrîdo ke tekê ci dinya de çin o, yeno meşnayîş. Dinya de zîndanê Guantanamo û sewbîna sey nimûne yenî dayîş, labelê ewja de daxî heqê pêvînayîşî û mektube estî. Labelê Îmrali de sîstemêko cîya esto. Ocalan şexsîyeto ke bi mîlyonan kesan sey ‘îradeya min o’ qebul kerdo yo. Bi rojan o seba ewleyî, weşî û azadîya ci merdimî rasteyan de yî, labelê dewlete bêvengîya xo pawena û na zî yena manaya ke komplo dewam kena.”


Ganî keye û avûkatî pêvînayîş bikerî

Aydenîze dîyar kerde ke şarê Mezopotamyayî Ocalanî seba xo sey Ocalanî vînenî’ û wina va: “Sîstemê tecrîdî şero ke Rojhelato Mîyanên de esto ra cîya nîyo. Şerê Dinya yê 3. xo ra parçeyêkî komplo yo. Derheqê weşî û ewleyîya Birêz Ocalanî de gumanê tewr şenikî daxî beno sebebê cîyayan. Xo ra verê cû zî çîyê winasî ameybî dîyayîş. Seba ke nika ra pey kaos nêbo, ganî bi hawayo rew derheqê weşî û ewleyîye de melumat bêro dayîş û pêvînayîş bêro kerdiş.”



NAVENDA XEBERAN